ប្រធានាធិបតី ស៉ី ជីនពីង ទទូចឲ្យពង្រឹងការប្រយុទ្ធប្រឆាំងអំពើពុករលួយនៅក្នុងជួរយោធាចិន
31-07-2026 14:51
(ប៉េកាំង)៖ ទីភ្នាក់ងារសារព័ត៌មានចិន Xinhua នាថ្ងៃសុក្រ ទី៣១ ខែកក្កដា ឆ្នាំ២០២៦ បានរាយការណ៍ថា ប្រធានាធិបតីចិន លោក ស៊ី ជីនពីង បានទទូចឱ្យថ្នាក់ដឹកនាំជាន់ខ្ពស់ នៃគណបក្សកុម្មុយនីស្តកាន់អំណាច បន្តពង្រឹងការប្រយុទ្ធប្រឆាំងអំពើពុករលួយក្នុងជួរយោធា និងជំរុញការធ្វើទំនើបកម្មវិស័យការពារជាតិ។
លោក ស៊ី បានថ្លែងនៅក្នុងសម័យប្រជុំមួយនៃការិយាល័យនយោបាយ ដែលជាស្ថាប័នសម្រេចចិត្តកំពូលរបស់ចិនថា «កាណុងកាំភ្លើង ត្រូវតែស្តាប់បង្គាប់បញ្ជារបស់បក្សជានិច្ច»។ ទីភ្នាក់ងារសារព័ត៌មាន Xinhua បានឲ្យដឹងទៀតថា លោក ស៉ី ជីនពីង ក៏បានអំពាវនាវផងដែរ ឲ្យបង្កើតប្រព័ន្ធយោធាឆ្លាតវៃ ដែលរួមមានទាំងការប្រើប្រាស់បច្ចេកវិទ្យាដ្រូនកាន់តែច្រើន និងការប្រើប្រាស់ប្រព័ន្ធព័ត៌មានតាមអ៉ីនធើណិត ឱ្យកាន់តែស៊ីជម្រៅ។
ការអត្ថាធិប្បាយរបស់លោកប្រធានាធិបតីចិន រួមជាមួយកិច្ចប្រជុំការិយាល័យនយោបាយខាងលើនេះ កើតមានមុនខួបលើកទី៩៩ នៃការបង្កើតកងទ័ពរំដោះប្រជាជនចិន នៅថ្ងៃសៅរ៍ចុងសប្តាហ៍នេះ។ ស្របពេលអ្នកវិភាគវិស័យការពារជាតិមួយចំនួន យល់ឃើញខួបលើកនេះត្រូវបានគេរំពឹងថា នឹងប្រារព្ធឡើងក្នុងលក្ខណៈមិនគគ្រឹកគគ្រេងក៏ដោយ វានឹងបម្រើជាការគូសរំលេច សម្រាប់គម្រប់ខួបមួយសតវត្សរ៍ដែលជិតមកដល់ ខណៈវាគឺជាឆ្នាំដែលបក្សកុម្មុយនីស្តចិន បានជំរុញឲ្យសម្រេចឱ្យបាន វឌ្ឍនភាពបន្ថែមទៀតក្នុងការធ្វើទំនើបកម្មយោធា និងការត្រៀមខ្លួនប្រយុទ្ធរបស់ចិន។
គម្រប់ខួបខាងលើ គឺចំពេលនៃការបន្តយុទ្ធនាការបោសសម្អាតអំពើពុករលួយក្នុងជួរយោធាចិន ដែលរបាយការណ៍ ដោយមជ្ឈមណ្ឌលស្រាវជ្រាវផ្នែកការពារជាតិឈានមុខគេមួយ មានមូលដ្ឋាននៅទីក្រុងឡុងដ៍ បាននិយាយកាលពីខែកុម្ភៈថា បានរារាំងការពង្រឹងសមត្ថភាពត្រៀមខ្លួនប្រយុទ្ធ និងបន្សល់ទុកនូវកង្វះខាតធ្ងន់ធ្ងរ ក្នុងរចនាសម្ព័ន្ធបញ្ជាការ របស់កងកម្លាំងយោធាចិន។
កាលពីឆ្នាំ២០២៥ ក្រសួងការពារជាតិអាមេរិក បាននិយាយថា យោធាអាមេរិកជឿថា មេដឹកនាំចិនចង់ឲ្យយោធារបស់ខ្លួនត្រៀមលក្ខណៈរួចរាល់ ដើម្បីអាចឈ្នះជម្លោះលើកោះតៃវ៉ាន់ នៅត្រឹមឆ្នាំ២០២៧។ ប៉ុន្តែការវាយតម្លៃថ្មីៗក្រោយមកទៀត ពីសហគមន៍ស៊ើបការណ៍សម្ងាត់អាមេរិកបាននិយាយថា ទីក្រុងប៉េកាំងបច្ចុប្បន្នមិនមានផែនការឈ្លានពានតៃវ៉ាន់នៅឆ្នាំ២០២៧ទេ ហើយចង់គ្រប់គ្រងដែនកោះនេះ ដោយមិនចាំបាច់ប្រើប្រាស់កម្លាំងយោធា។
គួរបញ្ជាក់ថា ចិនចាត់ទុកតៃវ៉ាន់ ដែលស្ថិតក្រោមការដឹកនាំបែបលទ្ធិប្រជាធិបតេយ្យ ថាជាទឹកដីរបស់ខ្លួន ហើយមិនដែលបោះបង់ចោល ជម្រើសនៃការប្រើប្រាស់កម្លាំងយោធា ដើម្បីគ្រប់គ្រងឱ្យបាននោះឡើយ។ ប៉ុន្មានឆ្នាំមកហើយ ទីក្រុងប៉េកាំងបានដាក់ពង្រាយនាវាក៏ដូចជាយន្តហោះចម្បាំង នៅជុំវិញកោះតៃវ៉ាន់ជារៀងរាល់ថ្ងៃ៕
