(ឥណ្ឌា)៖ ប្រទេសឥណ្ឌាកំពុងបង្ហាញពីការរីកចម្រើនយ៉ាងឆាប់រហ័ស និងឈានមុខគេក្នុងចំណោមប្រទេសលំដាប់កំពូល ក្នុងការនាំចេញ និងប្រើប្រាស់រថយន្តអគ្គិសនី (EV) នៅលើពិភពលោក។

គិតត្រឹមដើមឆ្នាំ២០២៥ ឥណ្ឌាមានយានយន្តអគ្គិសនីចុះបញ្ជីសរុបជាង ៥.៦លានគ្រឿង ដែលជាការកើនឡើងគួរឱ្យកត់សម្គាល់បើធៀបនឹងឆ្នាំ ២០១៦ ដែលមានត្រឹមតែប្រហែល ៥ ម៉ឺនគ្រឿងប៉ុណ្ណោះ។ ជាក់ស្តែង ក្នុងឆ្នាំ ២០២៤ តែមួយ ការលក់រថយន្ត EV នៅឥណ្ឌាសម្រេចបានរហូតដល់ ២.០៨ លានគ្រឿង ស្មើនឹងប្រហែល ១១ ភាគរយនៃការលក់ EV សរុបទូទាំងសកលលោក។

ប្រទេសឥណ្ឌាកំពុងពន្លឿនការផ្លាស់ប្តូរទៅរកការដឹកជញ្ជូនបែបបៃតង តាមរយៈសមិទ្ធផលសំខាន់ៗដូចជា ការផលិតនិងនាំចេញជាសកល។ លោកនាយករដ្ឋមន្ត្រី ណារិនដ្រា ម៉ូឌី (Narendra Modi) បានសម្ពោធរថយន្តអគ្គិសនីយុទ្ធសាស្ត្រដំបូងបង្អស់របស់ក្រុមហ៊ុន Suzuki គឺម៉ូដែល «eVITARA នៅរោងចក្រ Hansalpur ដើម្បីនាំចេញទៅកាន់ជាង ១០០ ប្រទេស។

លើសពីនេះ តាមរយៈកិច្ចសហការរវាងក្រុមហ៊ុន Toshiba, Denso និង Suzuki ឥណ្ឌាអាចផលិតបន្ទះអេឡិចត្រូតអាគុយ (Hybrid Battery Electrodes) ក្នុងស្រុកបាន ៨០% ដោយខ្លួនឯង។ សន្ទុះនៃការអភិវឌ្ឍនេះ គឺដើម្បីគាំទ្រដល់គោលដៅអាកាសធាតុដ៏ធំរបស់ឥណ្ឌា រួមមានការសម្រេចឱ្យបាននូវការប្រើប្រាស់រថយន្ត EV ៣០% នៃយានយន្តសរុបត្រឹមឆ្នាំ ២០៣០ និងសម្រេចគោលដៅអព្យាក្រឹតកាបូន (Net-Zero) ទាំងស្រុងត្រឹមឆ្នាំ ២០៧០។

កំណើនដ៏ខ្លាំងក្លានៃការប្រើប្រាស់រថយន្ត EV នេះ ត្រូវបានគាំទ្រដោយគំនិតផ្តួចផ្តើម និងគោលនយោបាយរបស់រដ្ឋាភិបាលឥណ្ឌា ដូចជាកម្មវិធី FAME ដែលជាកម្មវិធីជំរុញការផលិត និងប្រើប្រាស់យានយន្តអគ្គិសនី, កម្មវិធី PLI (ការផ្តល់ការលើកទឹកចិត្តផ្នែកហិរញ្ញវត្ថុ) និងគម្រោង PM e-Bus Sewa (គម្រោងឡានក្រុងអគ្គិសនីសាធារណៈ)។

កម្មវិធីទាំងនេះបានក្លាយជាកម្លាំងចលករក្នុងការទាក់ទាញការវិនិយោគលើហេដ្ឋារចនាសម្ព័ន្ធ EV ការច្នៃប្រឌិត និងការស្រាវជ្រាវ ដែលជួយជំរុញឱ្យឥណ្ឌាខិតទៅជិតគោលដៅរបស់ខ្លួន។

រថយន្តអគ្គិសនី (EV) មានការកើនឡើងខ្លាំងពីចំនួន ០.៧ ភាគរយក្នុងឆ្នាំ ២០២០ ទៅ ៦.៣ ភាគរយនៅក្នុងឆ្នាំ ២០២៤។ កំណើននៃការលក់រថយន្តអគ្គិសនី (EV) នេះ បានឆ្លុះបញ្ចាំងថា បច្ចុប្បន្នអត្រានៃការប្រើប្រាស់ រថយន្តអគ្គិសនី (EV) របស់ឥណ្ឌាបានកើនឡើងលើសពី ៤០ ភាគរយនៃកម្រិតមធ្យមរបស់ពិភពលោកទៅទៀត។ ទីផ្សារ រថយន្តអគ្គិសនី (EV) របស់ឥណ្ឌាត្រូវប៉ាន់ប្រមាណថានឹងរីកចម្រើនពី ៥.២២ ប៊ីលានដុល្លារអាមេរិក ក្នុងឆ្នាំ ២០២៤ ទៅដល់ជិត ១៨.៣ ប៊ីលានដុល្លារអាមេរិក ត្រឹមឆ្នាំ ២០២៩។

បន្ថែមពីលើនេះ ប្រទេសឥណ្ឌាក៏បានក្លាយជាប្រទេសឈានមុខគេដែលជាប្រទេសប្រើប្រាស់ ប្រភេទ កង់បី ឬ PassApp អគ្គិសនី ( Three-Wheeler) ច្រើនជាងគេក្នុងសកលលោកដោយក្តោបក្តាប់ចំណែករហូតដល់ ៥៧ ភាគរយនៃការលក់សរុបនៅលើពិភពលោកក្នុងឆ្នាំ ២០២៤។

ប្រទេសឥណ្ឌាបានប្តេជ្ញាថា នឹងសម្រេចឱ្យបាននូវការប្រើប្រាស់ រថយន្តអគ្គិសនី (EV) ឱ្យបាន ៣០ ភាគរយត្រឹមឆ្នាំ ២០៣០ ដែលបង្ហាញពីការយកចិត្តទុកដាក់ខ្ពស់ លើការធ្វើដំណើរប្រកបដោយចីរភាព និងសន្តិសុខថាមពល។ ហើយការបន្តផ្តោតយកចិត្តទុកដាក់របស់រដ្ឋាភិបាលលើការគាំទ្រផ្នែកគោលនយោបាយ ការអភិវឌ្ឍហេដ្ឋារចនាសម្ព័ន្ធ (ដូចជាស្ថានីយ៍សាកភ្លើង) និងកិច្ចសហប្រតិបត្តិការរវាងផ្នែករដ្ឋនិងឯកជន គឺពិតជាមានសារៈសំខាន់ណាស់ក្នុងការរក្សា និងជម្រុញសន្ទុះនៃការប្រើប្រាស់ រថយន្តអគ្គិសនី (EV) នេះឱ្យកាន់ទូលំទូលាយទូទាំងប្រទេស។

ជោគជ័យនៃការបង្កើតរោងចក្រផលិតផ្ទាល់ខ្លួន គួបផ្សំនឹងគោលនយោបាយច្បាស់លាស់របស់រដ្ឋាភិបាល កំពុងតែផ្លាស់ប្តូរប្រព័ន្ធដឹកជញ្ជូនរបស់ឥណ្ឌា ទៅជាបណ្តាញមួយដ៏មានចីរភាព និងត្រៀមខ្លួនរួចជាស្រេចសម្រាប់ពេលអនាគត៕