(ឡាហាវ៉ាន)៖ គុយបា បានប្រកាសព័ត៌មានលម្អិតថ្មីៗ ជុំវិញផែនការបើកឱកាសក្នុងវិស័យសំខាន់ៗ ដែលពីមុនដំណើរការដោយរដ្ឋ ទៅឱ្យឧស្សាហកម្មឯកជន ចំពោះមុខយុទ្ធនាការដាក់សម្ពាធ ពីសំណាក់ទីក្រុងវ៉ាស៉ីនតោន ក្នុងគោលបំណងបង្ខំឱ្យប្រទេសកុម្មុយនីស្តមួយនេះ ធ្វើកំណែទម្រង់សេដ្ឋកិច្ច។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នាថ្ងៃសុក្រ ទី៣១ ខែកក្កដា ឆ្នាំ២០២៦។

គុយបា បានអនុញ្ញាតឱ្យមានការបណ្តាក់ទុនវិនិយោគបរទេសដំបូង លើការនាំចូល និងលក់ឥន្ធនៈ ហើយអាជីវកម្មគុយបាជិត ២០០បានទទួលការអនុញ្ញាត ឱ្យចូលរួមក្នុងការចែកចាយប្រេងឥន្ធនៈលក់ដុំ។ នេះបើតាមនាយករដ្ឋមន្ត្រីគុយបា លោក Manuel Marrero Cruz។

សមាជិកសភាគុយបា បានអនុម័តច្បាប់កសិកម្មថ្មីមួយ ដើម្បីសម្រួលនីតិវិធីផ្តល់សិទ្ធិប្រើប្រាស់ដីធ្លី ដែលគ្រប់គ្រងដោយរដ្ឋ។ ប្រហែល ៨០ភាគរយនៃផ្ទៃដីគុយបា ត្រូវបានគ្រប់គ្រងដោយរដ្ឋ ខណៈ ២០ភាគរយដែលនៅសល់អាចជាកម្មសិទ្ធិរបស់ឯកជន។ គុយបា បានអនុម័តវិធានការចំនួន ១០ ដើម្បីជំរុញការវិនិយោគឯកជន រួមទាំងបន្ធូរបន្ថយការរឹតបន្តឹង សម្រាប់ក្រុមហ៊ុនទេសចរណ៍ អាជីវកម្មជួលរថយន្ត និងគម្រោងទេសចរណ៍បរិស្ថាន។ គុយបា ក៏មានគម្រោងបង្កើតតំបន់អភិវឌ្ឍសេដ្ឋកិច្ច សម្រាប់ក្រុមហ៊ុនបរទេស នៅក្នុងវិស័យទេសចរណ៍សុខភាព។

គួរបញ្ជាក់ថា ការប្រកាសនេះ បានធ្វើឡើងបន្ទាប់ពីក្រុមអ្នកតាក់តែងច្បាប់គុយបា ពិភាក្សាគ្នានៅក្នុងរដ្ឋសភា អស់រយៈពេល ២ថ្ងៃ ដែលបញ្ចប់ទៅកាលពីថ្ងៃព្រហស្បតិ៍។ កាលពីខែមុន ក្រុមអ្នកតាក់តែងច្បាប់ បានអនុម័តជាឯកច្ឆន្ទនូវកញ្ចប់វិធានការចំនួន ១៧៦ ដែលប្រសិនបើត្រូវដាក់ឱ្យអនុវត្តទាំងអស់ នោះវានឹងតំណាងឱ្យកំណែទម្រង់សេដ្ឋកិច្ចសង្គមនៃប្រទេសកោះមួយនេះ ក្នុងកិច្ចខិតខំប្រឹងប្រែងដើម្បីរស់រានមានជីវិត ពីការដាក់ទណ្ឌកម្មរបស់សហរដ្ឋអាមេរិក។ យ៉ាងនេះក្តី ប្រធានាធិបតីគុយបា លោក Miguel Diaz-Canel និយាយថា កំណែទម្រង់នេះ មិនមែនដើម្បីផ្គាប់ចិត្តសហរដ្ឋអាមេរិកទេ ហើយវិស័យសំខាន់ៗនៃសេដ្ឋកិច្ច នឹងមិនត្រូវបានធ្វើឯកជនភាវូបនីយកម្មឡើយ៕