(Reuters)៖ តម្លៃប្រេង នាថ្ងៃសុក្រនេះបានធ្លាក់ចុះ ប៉ុន្តែនៅតែមានតម្លៃថ្លៃ បើធៀបនឹងរយៈពេល ៥ខែមកនេះ ខណៈដែលមានលំហូរប្រេងច្រើន ចេញតាមច្រកផ្លូវសមុទ្រសំខាន់ៗទៅកាន់ទីផ្សារ ទោះបីចំណុចជាប់គាំង ក្នុងកិច្ចចរចារវាងសហរដ្ឋអាមេរិក និងអ៉ីរ៉ង់ នៅមិនទាន់អាចទម្លាយបានក៏ដោយ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នាថ្ងៃសុក្រ ទី៣១​ ខែកក្កដា ឆ្នាំ២០២៦។

ប្រេងឆៅប្រភេទ Brent មានតម្លៃ ៨៧,៥៩ដុល្លារក្នុងមួយបារ៉ែល ធ្លាក់ចុះ ១,៤៤ដុល្លារ ឬ ១,៦ភាគរយ។ ចំណែកប្រេងឆៅអាមេរិកប្រភេទ West Texas Intermediate មានតម្លៃ ៨២ដុល្លារក្នុងមួយបារ៉ែល ធ្លាក់ចុះ ១,៥៩ដុល្លារ ឬ ១,៩ភាគរយ។ លោក Daniel Hynes អ្នកវិភាគជាន់ខ្ពស់ផ្នែកមុខទំនិញនៅក្រុមហ៊ុន ANZ និយាយថាកំណើន នៃប្រេងចេញតាមច្រកសមុទ្រ Hormuz ជួយឱ្យតម្លៃធ្លាក់ចុះ ទោះបីជាភាពតានតឹងក្នុងតំបន់មជ្ឈិមបូព៌ា នៅតែបន្ត។

អារ៉ាប៊ីសាអូឌីត បាននិងកំពុងស្វែងរកការដឹកនាំក្រុមចម្រុះអន្តរជាតិមួយ ដើម្បីជំរុញកិច្ចសហប្រតិបត្តិការការពារជាតិ នៅច្រកសមុទ្រ Bab el-Mandeb សមុទ្រក្រហម និងឈូងសមុទ្រ Aden ដែលសុទ្ធសឹងតែជាចំណុចតភ្ជាប់ ការផ្គត់ផ្គង់ថាមពល។ ប្រទេសចំនួន ១៤ រួមមានជីប៊ូទី អេហ្ស៊ីប ប៉ាគីស្ថាន ស៊ូដង់ និងតួកគីយ៉េ បានគាំទ្រដល់ក្រុមចម្រុះនេះ៕