(ប៉េកាំង)៖ ក្រសួងពាណិជ្ជកម្មចិន នៅថ្ងៃសៅរ៍ ទី១ ខែសីហា ឆ្នាំ២០២៦ បាននិយាយថា ការដាក់បញ្ជូលបន្ថែមក្រុមហ៊ុនចិន ទៅក្នុងបញ្ជីនៃអង្គភាព ដែលសហរដ្ឋអាមេរិកចោទប្រកាន់ថា ប្រើប្រាស់កម្លាំងពលកម្មដោយបង្ខំ គឺគ្មានមូលដ្ឋានការពិតឡើយ ដោយអះអាងថា ទង្វើរបស់អាមេរិក បានរំខានចំពោះស្ថិរភាពនៃខ្សែច្រវាក់ផ្គត់ផ្គង់សកល។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្រសួងពាណិជ្ជកម្មចិន បានបញ្ជាក់នៅក្នុងសេចក្តីថ្លែងការណ៍មួយថា សហរដ្ឋអាមេរិកបានប្រើប្រាស់ច្បាប់ក្នុងស្រុករបស់ខ្លួន ដើម្បីដាក់ទណ្ឌកម្មឯកតោភាគីមកលើក្រុមហ៊ុនចិន ដែលជាទង្វើដាក់គំនាបសេដ្ឋកិច្ចយ៉ាងច្បាស់ក្រឡែត និងបានប៉ះពាល់ដល់សិទ្ធិស្របច្បាប់ របស់ក្រុមហ៊ុនទាំងនោះ។

ក្រសួងបន្តថា ប្រទេសចិនប្រឆាំងការប្រើប្រាស់ពលកម្មដោយបង្ខំ ហើយតំបន់ស៊ីនជាំង (Xinjiang) ដែលអាមេរិកអះអាងថា មានការរំលោភសិទ្ធិមនុស្ស គឺជាក់ស្តែងមានស្ថិរភាព វិបុលភាព និងគ្មានការប្រើពលកម្មបង្ខំសោះឡើយ។ សេចក្តីថ្លែងការណ៍ដដែល បន្ថែមថា ចិនជំរុញឱ្យអាមេរិកបញ្ឈប់ការវាយប្រហារនិងបង្ខូចកេរ្តិ៍ឈ្មោះ តំបន់ស៊ីនជាំងជុំវិញបញ្ហានេះ ហើយបញ្ចប់ការដាក់សម្ពាធដ៏អយុត្តិធម៌ មកលើក្រុមហ៊ុនចិន។ ជាចុងក្រោយ ទីក្រុងប៉េកាំងបានព្រមានថា ខ្លួននឹងចាត់វិធានការដើម្បីការពារសិទ្ធិរបស់ក្រុមហ៊ុនចិន។

គួរបញ្ជាក់ថា កាលពីថ្ងៃសុក្រសប្តាហ៍នេះ សហរដ្ឋអាមេរិកបានហាមឃាត់ការនាំចូលពីក្រុមហ៊ុនចិនចំនួន ៤៣បន្ថែមទៀត ជុំវិញការចោទប្រកាន់ពីការរំលោភសិទ្ធិមនុស្សលើជនជាតិ Uyghur និងក្រុមជនជាតិភាគតិចដទៃទៀត។ ក្រុមហ៊ុនទាំងនោះ ត្រូវបានបន្ថែមចូលទៅក្នុងបញ្ជីអង្គភាព នៃច្បាប់អាមេរិកស្តីពីការការពារការប្រើពលកម្មដោយបង្ខំរបស់ជនជាតិ Uyghur ដែលរឹតបន្តឹងការនាំចូលទំនិញជាប់ពាក់ព័ន្ធនឹង អ្វីដែលសហរដ្ឋអាមេរិកអះអាងថា ជាការរំលោភសិទ្ធិមនុស្ស និងអំពើប្រល័យពូជសាសន៍ ដែលកំពុងបន្តនៅក្នុងតំបន់ស៊ីនជាំង៕