(កដ្ឋមណ្ឌូ)៖ លោក Nirmal Purja ដែលជាអ្នកឡើងភ្នំដ៏ល្បីល្បាញជនជាតិនេប៉ាល់ និងជាម្ចាស់កំណត់ត្រាឡើងដល់កំពូលភ្នំខ្ពស់បំផុតទាំង ១៤របស់ពិភពលោកក្នុងរយៈពេលលឿនបំផុតនោះ បានទទួលមរណភាពក្នុងគ្រោះថ្នាក់បាក់ផ្ទាំងព្រិលទឹកកក អំឡុងពេលធ្វើដំណើរឡើងភ្នំមួយនៅប្រទេសប៉ាគីស្ថាន។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសៅរ៍ ទី១ ខែសីហា ឆ្នាំ២០២៦។

«យើងសូមបញ្ជាក់ដោយក្តីសោកសៅ និងការឈឺចាប់យ៉ាងខ្លាំងបំផុតថា លោក Nirmal Purja បានបាត់បង់ជីវិតហេីយ​ បន្ទាប់ពីមានហេតុការណ៍បាក់ផ្ទាំងព្រិលទឹកកក នៅលើភ្នំ Broad Peak»។ នេះបើយោងតាមការបង្ហោះលើ Instagram របស់ក្រុមហ៊ុន Elite Exped ដែលជាអ្នករៀបចំដំណើរឡើងភ្នំឱ្យលោក Nirmal Purja។ ក្រុមហ៊ុន បន្ថែមថា «យើងក៏ទទួលបានការបញ្ជាក់ផងដែរថា សមាជិកផ្សេងទៀតនៃក្រុមបេសកកម្មនេះ ជាអកុសលមិនបានរួចជីវិតឡើយ»។

លោក Purja អាយុ ៤៣ឆ្នាំ និងមនុស្ស ៩នាក់ទៀត បានបាត់ខ្លួនតាំងពីថ្ងៃព្រហស្បតិ៍​នៅឯភ្នំ Broad Peak ដែលមានកម្ពស់ ៨ ០៥១ ម៉ែត្រ​។ ក្នុងចំណោមនោះ មានជនជាតិនេប៉ាល់ចំនួន ៦នាក់ ហើយអ្នកផ្សេងមកពីប៉ាគីស្ថាន អូម៉ង់ អាមេរិក និងចិន។ ភ្នំនេះជាភ្នំខ្ពស់ជាងគេលំដាប់ទី ១២ របស់ពិភពលោក និងជាភ្នំដែលមានបច្ចេកទេសឡើងស្មុគស្មាញ ស្ថិតនៅក្នុងតំបន់ Gilgit-Baltistan នៃប្រទេសប៉ាគីស្ថាន។ បេីតាមក្រុមមន្ត្រី សពលោក Purja និងអ្នកឡើងភ្នំផ្សេងទៀតត្រូវបានប្រទះឃើញនៅទីតាំងមួយដែលពិបាកចូលទៅដល់ ហើយនៅមិនទាន់នាំយកចុះមកវិញបាននៅឡើយទេ។

គួរបញ្ជាក់ថា លោក Purja ដែលធ្លាប់បម្រើការក្នុងជួរកងទ័ពអង់គ្លេសជាមួយកងទ័ព Gurkha និងក្រោយមកនៅក្នុងកងកម្លាំងពិសេស បានបំពេញស្នាដៃដ៏អស្ចារ្យដោយបំបែកកំណត់ត្រានៅឆ្នាំ ២០១៩។ លោកក្លាយជាបុគ្គលដែលគេស្គាល់យ៉ាងទូលំទូលាយនៅទូទាំងពិភពលោក បន្ទាប់ពីភាពយន្តឯកសាររបស់ Netflix ដែលរៀបរាប់ពីដំណើរផ្សងព្រេងរបស់លោកមានចំណងជើងថា "14 Peaks: Nothing Is Impossible" ត្រូវបានចេញផ្សាយនៅពីរឆ្នាំក្រោយមក៕