​(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃសៅរ៍ ទី១ ខែសីហា ឆ្នាំ២០២៦ (ម៉ោងនៅសហរដ្ឋអាមេរិក) បាននិយាយថាសហរដ្ឋអាមេរិក និងអ៉ីស្រាអែលបានយល់ព្រមលុបចោលគម្រោងវាយប្រហារថ្មីមួយលើអ៉ីរ៉ង់ ជាមួយការអះអាងថាសម្ព័ន្ធមិត្តអាមេរិកក្នុងតំបន់មជ្ឈិមបូព៌ាបានឈានដល់កិច្ចព្រមព្រៀងក្របខណ្ឌមួយដើម្បីបិទបញ្ចប់សង្រ្គាមអ៉ីរ៉ង់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការភ័យខ្លាចបានកើនឡើងថាការប្រយុទ្ធគ្នាអាចនឹងឡើងកម្ដៅសាជាថ្មី បន្ទាប់ពីលោក ត្រាំបានគំរាមវាយអ៉ីរ៉ង់ឱ្យទ្រោមខ្លួន និងត្រូវបានរាយការណ៍ថាកំពុងពិចារណាបើកការវាយប្រហារសាជាថ្មីលើហេដ្ឋារចនាសម្ព័ន្ធថាមពលអ៉ីរ៉ង់។ ទូរទស្សន៍អាមេរិក CBS ក៏បានរាយការណ៍ដែរថាសហរដ្ឋអាមេរិក និងអ៉ីស្រាអែលបានរៀបចំគម្រោងវាយប្រហារ រួមគ្នាដែលដំបូងឡើយគ្រោងនឹងធ្វើនៅចុងសប្ដាហ៍នេះ ជាមួយការកំណត់គោលដៅលើរោងច្រកចម្រាញ់ប្រេង និងរោងចក្រថាមពលរបស់អ៉ីរ៉ង់។

ក៏ប៉ុន្តែលោក ត្រាំ បានប្រកាសលុបចោលគម្រោងវាយប្រហារនេះក្នុងការបង្ហោះមួយលើបណ្ដាញទំនាក់ទំនងសង្គម Truth Social នៅថ្ងៃសៅរ៍ចុងសប្ដាហ៍នេះ។ លោក ត្រាំ បានគូសបញ្ជាក់ថាសហរដ្ឋអាមេរិកបានត្រៀមរួចស្រេចដើម្បីវាយប្រហារលើអ៉ីរ៉ង់ដ៏ខ្លាំងក្លាបំផុតមួយដែលគេមិនធ្លាប់បានឃើញចាប់តាំងពីសង្រ្គាមលោកលើកទី២មក។ តែដោយមានការស្នើសុំពីអ៉ីរ៉ង់ និងបណ្ដាប្រទេសដទៃក្នុងតំបន់មជ្ឈិមបូព៌ា លោកបានយល់ព្រមលុបចោលការវាយប្រហារ ដើម្បីបើកផ្លូវឱ្យកិច្ចព្រមព្រៀងមួយត្រូវបានឈានដល់ឱ្យបានឆាប់រហ័ស។ លោក ត្រាំបន្ថែមថាអ៉ីស្រាអែលក៏បានចូលរួមក្នុងការលុបចោល គម្រោងវាយប្រហារលើអ៉ីរ៉ង់ផងដែរ។

គួរបញ្ជាក់ថា បើតាមលោក ត្រាំ កិច្ចព្រមព្រៀងដែលលោកបានអះអាង នឹងរួមមានបញ្ចូលទាំងការបើកច្រកសមុទ្រ Hormuz ភ្លាមៗ និងលុបបំបាត់ការគំរាមកំហែងនុយក្លេអ៊ែររបស់អ៉ីរ៉ង់។ ខាងអ៉ីរ៉ង់មិនបានធ្វើអត្ថាធិប្បាយអ្វីទេ។ ប៉ុន្តែកាសែតអាមេរិក Axios បានរាយការណ៍ថាព្រះអង្គម្ចាស់រជ្ជទាយាទអារ៉ាប៊ីសាអូឌីត Mohammed Bin Salman បានបើកកិច្ចសន្ទនាតាមទូរស័ព្ទជាមួយលោក ត្រាំ កាលពីថ្ងៃសៅរ៍ ដោយបង្ហាញការព្រួយបារម្ភ និងស្នើសុំការបញ្ជាក់ឱ្យបានច្បាស់ពីផែនការរបស់សហរដ្ឋអាមេរិកចំពោះអ៉ីរ៉ង់។

តាម Axios ព្រះអង្គម្ចាស់ Bin Salman បានជំរុញឱ្យលោក ត្រាំ បន្ធូរបន្ថយជម្លោះ និងបញ្ចៀសការវាយប្រហារជាថ្មីណាមួយលើអ៉ីរ៉ង់៕