(ប៉េកាំង)៖ ចាប់ពីការវិវត្តន៍ថាមពលបៃតងនៃរថយន្តដើរដោយថាមពលថ្មី ថ្ម/អាគុយលីចូម និងផលិតផលសូឡា រហូតដល់បញ្ញាសិប្បនិម្មិត មនុស្សយន្ត និងឱសថច្នៃប្រឌិត ប្រសិទ្ធភាពនៃការអភិវឌ្ឍ ប្រកបដោយគុណភាពខ្ពស់នៃផលិតកម្មរបស់ចិនគឺគួរឱ្យភ្ញាក់ផ្អើល។ ការស្ទង់មតិមួយដែលបណ្តាញទូរទស្សន៍ CGTN នៃអគ្គស្ថានីយវិទ្យុនិងទូរទស្សន៍មជ្ឈិមចិនបានធ្វើឡើងចំពោះអ្នកលេងអ៊ីនធឺណិត ចំនួន ៣៣៣៩នាក់នៅទូទាំងពិភពលោក បានបង្ហាញថាអ្នកផ្តល់បទសម្ភាសន៍ចំនួន ៩៣,១% បានយល់ឃើញថា ការអភិវឌ្ឍនៃផលិតផលបញ្ញាសិប្បនិម្មិត មនុស្សយន្ត និងឱសថច្នៃប្រឌិតរបស់ ប្រទេសចិនទទួលបានលទ្ធផលគួរឱ្យកត់សម្គាល់ ដែលបានឆ្លុះបញ្ចាំងពីផលិតកម្មរបស់ប្រទេសចិនបានចាប់ផ្តើមផ្តល់បច្ចេកវិទ្យាដើម ប្រព័ន្ធឆ្លាតវៃ និងដំណោះស្រាយដល់ទីផ្សារអន្តរជាតិ អ្នកផ្តល់បទសម្ភាសន៍រំពឹងថា វិស័យទាំងបីនេះនឹងផ្តល់ភាគលាភច្នៃប្រឌិតកាន់តែច្រើននាពេលអនាគត។

យោងតាមទិន្នន័យរបស់អគ្គរដ្ឋបាលគយចិនឱ្យដឹងថា ការនាំចេញមនុស្សយន្តឧស្សាហកម្មរបស់ប្រទេសចិនក្នុងឆមាសទីមួយនៃឆ្នាំ២០២៦ បានកើនឡើង១៨,៦% បើធៀបនឹងរយៈពេលដូចគ្នានៃឆ្នាំមុន ។ លើសពីនេះទៀត យោងតាមព័ត៌មានពីនិយតករឱសថជាតិចិន ទំហំពាណិជ្ជកម្មនៃឱសថច្នៃប្រឌិតរបស់ប្រទេសចិនដែលផ្តល់សិទ្ធិឱ្យបរទេសក្នុងឆមាសទីមួយនៃឆ្នាំ ២០២៦ មានចំនួនប្រហែល ១១០ ពាន់លានដុល្លារអាមេរិក។

នៅក្នុងការស្ទង់មតិ អ្នកផ្តល់បទសម្ភាសន៍ចំនួន ៨៧,២ % បានចង្អុលបង្ហាញថាគុណសម្បត្តិនៃផលិតកម្មរបស់ចិនមិនត្រឹមតែបង្ហាញពីបរិមាណប៉ុណ្ណោះទេ ប៉ុន្តែថែមទាំងបានប្រមូលផ្តុំធនធានសកល និងការធ្វើឱ្យប្រសើរឡើងជាបន្តបន្ទាប់ផងដែរ៕

វិទ្យុមិត្តភាពកម្ពុជាចិន