(កូឡុំបូ)៖ ស្រីលង្កា បាននិងកំពុងរឹតបន្តឹងសន្តិសុខពន្ធនាគារនៅទូទាំងប្រទេស បន្ទាប់ពីផ្ទុះកុបកម្មនាំឱ្យមានមនុស្សស្លាប់ម្នាក់ និង ៦នាក់របួស ស្របពេលព្យាយាមគ្រប់គ្រងអ្នកទោសដ៏ច្រើនលើសលប់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី៣​ ខែសីហា ឆ្នាំំ២០២៦។

កាលពីថ្ងៃសៅរ៍ អ្នកទោសនៅ Mahara prison ដែលជាពន្ធនាគារមានសុវត្ថិភាពខ្ពស់មួយ ក្នុងប្រទេសស្រីលង្កា បានបង្កការបំផ្លិចបំផ្លាញដល់មន្ទីរពេទ្យ កន្លែងបណ្តុះបណ្តាល និងផ្ទះបាយ។ តាមការបញ្ជាក់របស់ប៉ូលិស កុបកម្មបានផ្ទុះឡើងអំឡុងពេលគ្រួសារអ្នកទោសចូលសួរសុខទុក្ខពួកគេ ដោយអ្នកទោសខ្លះបានឡើងលើដំបូលអគារ និងដុតបំផ្លាញអគារក្នុងបរិវេណពន្ធនាគារ ព្រមទាំងដុតឯកសារនានាដែលរក្សាទុក នៅក្នុងការិយាល័យរដ្ឋបាល។

ស្នងការរងប៉ូលិស លោក Sajeewa Medawatta ប្រាប់អ្នកសារព័ត៌មានកាលពីថ្ងៃអាទិត្យថា នេះជាហេតុការណ៍ធ្ងន់ធ្ងរបំផុតសម្រាប់ស្រីលង្កា គិតចាប់តាំងពីឆ្នាំ២០១២ ដោយកងកម្លាំងពិសេសរបស់នគរបាល កងទ័ព និងកងទ័ពជើងទឹក ត្រូវបានហៅឱ្យមកជួយគ្រប់គ្រងស្ថានការណ៍។ លោក Medawatta បញ្ជាក់ថា «មានការយកចិត្តទុកដាក់បង្កើនសន្តិសុខ តាមពន្ធនាគារធំៗទាំងអស់ ជាពិសេសពន្ធនាគារដែលស្ថិតនៅជិតទីក្រុងកូឡុំបូ រួមទាំងពន្ធនាគារ Negombo។ មន្ត្រីពន្ធនាគារបានប្តូរទីតាំងអ្នកទោសទៅកាន់បន្ទប់ឃុំឃាំងវិញ ហើយស្ថានភាពគឺអាចគ្រប់គ្រងបាន»។

គួរបញ្ជាក់ថា ពន្ធនាគារ Mahara ស្ថិតនៅចម្ងាយប្រហែល ១៥គីឡូម៉ែត្រ ពីរដ្ឋធានីកូឡុំបូ និងមានអ្នកទោសប្រហែល ៤ ១០០នាក់ ដែលលើសពីសមត្ថភាពផ្ទុកប្រហែល ៤ដង។ ស្ថានភាពនេះឆ្លុះបញ្ចាំងពីវិបត្តិជាប្រព័ន្ធ នៃបណ្តាញពន្ធនាគារទូទាំងប្រទេសស្រីលង្កា ដែលកំពុងឃុំខ្លួនអ្នកទោសជាង ៤១ ០០០នាក់ក្នុងពន្ធនាគារ ២២កន្លែង ខណៈដែលសមត្ថភាពផ្ទុកសរុប អាចបានត្រឹមតែប្រហែល ១១ ០០០នាក់ប៉ុណ្ណោះ៕