រដ្ឋាភិបាលមីយ៉ាន់ម៉ា អះអាងថា អតីតមេដឹកនាំ អោងសាន ស៊ូជី បានជួបជាមួយមន្រ្តីកាកបាទក្រហមអន្តរជាតិ (Video inside)
03-08-2026 13:32
(ណៃពិដោ)៖ រដ្ឋាភិបាលមីយ៉ាន់ម៉ា បានអះអាងថា អតីតមេដឹកនាំដែលជាប់ឃុំ គឺលោកស្រី អោងសាន ស៊ូជី បានជួបជាមួយអ្នកតំណាងរបស់គណៈកម្មាធិការកាកបាទក្រហមអន្តរជាតិ នាថ្ងៃចន្ទ ទី៣ ខែសីហា ឆ្នាំ២០២៦ ចំពេលមានការព្រួយបារម្ភខ្លាំងអំពីសុខភាពរបស់លោកស្រី ដែលមានវ័យ៨១ឆ្នាំហើយនោះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។
ម្ចាស់ពានរង្វាន់ណូបែលសន្តិភាពរូបនេះ ត្រូវបានឃុំខ្លួនចាប់តាំងពីខែកុម្ភៈ ឆ្នាំ២០២១ នៅពេលយោធាមីយ៉ាន់ម៉ា បានផ្តួលរំលំរដ្ឋាភិបាលស៊ីវិលជាប់ឆ្នោត ដែលដឹកនាំដោយលោកស្រី ក្នុងរដ្ឋប្រហារដែលបានធ្វើឲ្យប្រទេសអាស៊ានមួយនេះ ធ្លាក់ចូលទៅក្នុងភាពចលាចលអូសបន្លាយទល់បច្ចុប្បន្ន។ ចាប់តាំងពីពេលនោះមក ទីតាំងពិតប្រាកដនិងស្ថានភាពសុខភាពរបស់លោកស្រី ស៊ូជី គឺពិបាកក្នុងការកំណត់ជាខ្លាំង ដ្បិតគ្មានមេដឹកនាំឬបេសកជនបរទេសណាម្នាក់ បានជួបលោកស្រីជាសាធារណៈឡើយ រហូតដល់ថ្នាក់មានការសង្ស័យថា តើលោកស្រី ពិតជានៅមានជីវិតឬក៏យ៉ាងណា ថែមទៀតផង។
អ្នកនាំពាក្យរដ្ឋាភិបាលមីយ៉ាន់ម៉ា លោកស្រី Khine Khine Soe បានអះអាងក្នុងសារតាមបណ្តាញ Telegram ថា នាថ្ងៃចន្ទនេះ លោកស្រី ស៊ូជី បានជួបជាមួយលោក Arnaud de Baecque ដែលជាអ្នកតំណាងប្រចាំរបស់គណៈកម្មាធិការកាកបាទក្រហមអន្តរជាតិ (ICRC) នៅប្រទេសមីយ៉ាន់ម៉ា។ ជំនួបនោះធ្វើឡើងនៅរដ្ឋធានីណៃពិដោ ហើយអ្នកនាំពាក្យ ក៏បានបង្ហាញរូបភាពលោកស្រី ស៊ូជី ជាមួយលោក Baecque ផងដែរ។ យ៉ាងណាមិញ ICRC មិនទាន់ឆ្លើយតបភ្លាមៗ ចំពោះសំណើសុំការអត្ថាធិប្បាយ ជុំវិញដំណឹងនេះនៅឡើយទេ។
គួរបញ្ជាក់ថា កាលពីចុងខែមេសា បន្ទាប់ពីការបោះឆ្នោតសកល ដែលរៀបចំដោយរដ្ឋាភិបាលយោធា ហើយបានអនុញ្ញាតឲ្យអតីតមេដឹកនាំរបបសឹក លោក Min Aung Hlaing ក្លាយជាប្រធានាធិបតីស៉ីវិល និងចំពេលមានសម្ពាធកើនឡើងពីអន្តរជាតិ អាជ្ញាធរមីយ៉ាន់ម៉ាបានប្រកាសថា លោកស្រី ស៊ូជី ត្រូវបានផ្លាស់ប្តូរទៅឃុំខ្លួននៅក្នុងផ្ទះវិញ៕
