(ប៉េកាំង)៖ ប្រទេសចិន បាននិងកំពុងការពារគោលនយោបាយសេដ្ឋកិច្ចចម្រុះរបស់ខ្លួន ដែលផ្តល់អាទិភាពដល់ឧស្សាហកម្ម ជាជាងការប្រើប្រាស់ ខណៈជំហរនេះត្រូវបានអ្នកវិភាគមើលឃើញថា ជាការបង្ហាញពីទំនុកចិត្តកាន់តែខ្លាំងឡើង មុនឈានដល់កិច្ចចរចាពាណិជ្ជកម្ម ជាមួយសហភាពអឺរ៉ុប (EU) ក៏ដូចជាជាមួយសហរដ្ឋអាមេរិក ក្នុងពេលឆាប់ៗខាងមុខ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី៣ ខែសីហា ឆ្នាំ២០២៦។

បណ្តាប្រទេសលោកខាងលិច ចាត់ទុកគោលនយោបាយរបស់ចិន ថាមានលក្ខណៈជាតិនិយម និងផ្ទុយពីវិធានពាណិជ្ជកម្មសកល តាមរយៈការផ្តល់អាទិភាពដល់អ្នកផលិត ជាងពលរដ្ឋដែលជាអ្នកប្រើប្រាស់ ជាហេតុជំរុញឱ្យមានការនាំចេញទំនិញតម្លៃធូរថ្លៃទៅកាន់ទីផ្សារពិភពលោក ដែលធ្វើឱ្យវិស័យឧស្សាហកម្មក្នុងប្រទេស ដែលកំពុងស្វែងរកកំណើនប្រកបដោយតុល្យភាព ត្រូវចុះខ្សោយ។

យ៉ាងនេះក្តី នៅក្នុងកិច្ចប្រជុំនៃថ្នាក់ដឹកនាំជាន់ខ្ពស់របស់បក្សកុម្មុយនីស្ត កាលពីសប្តាហ៍មុន ចិនបានប្រកាសបន្តអនុវត្តគោលនយោបាយដដែល ដោយអំពាវនាវឱ្យមានការគាំទ្រចំពោះវិស័យជាក់លាក់ ជាជាងប្រើវិធានការជំរុញសេដ្ឋកិច្ច ដែលផ្តោតលើអ្នកប្រើប្រាស់ និងការកែទម្រង់រចនាសម្ព័ន្ធ ដែលដៃគូពាណិជ្ជកម្មរបស់ចិន និងក្រុមអ្នកសេដ្ឋកិច្ចជាច្រើន ទទូចឱ្យធ្វើជាយូរមកហើយនោះ។

សេដ្ឋវិទូជាន់ខ្ពស់មកពីស្ថាប័ន Economist Intelligence Unit លោក Xu Tianchen និយាយថាសារទាំងនោះ មិនត្រឹមតែបញ្ជាក់ច្បាស់ទៅកាន់លោកខាងលិចថា ចិននឹងមិនផ្លាស់ប្តូរគោលជំហររបស់ខ្លួននោះទេ ប៉ុន្តែថែមទាំងបានបញ្ជូនសញ្ញាបង្ហាញពីឥរិយាបថចំនួន ២។ «ចំណុចទី ១ គឺការសង្ឃឹមថា អ្នកដទៃនឹងយល់ពីប្រភពដើមនៃបញ្ហា។ ការណ៍ដែលយល់ពីគ្នាទៅវិញទៅមក នឹងសម្រួលដល់កិច្ចចរចា។ រីឯចំណុចទី ២ នោះគឺការកំណត់បន្ទាត់ក្រហម»។ នេះជាការបន្ថែមរបស់លោក Xu។

គួរបញ្ជាក់ថា លោកប្រធានាធិបតី ស៉ី ជីនពីង និងលោកប្រធានាធិបតីអាមេរិក ដូណាល់ ត្រាំ គ្រោងជួបគ្នាផ្ទាល់ទៀតក្នុងឆ្នាំនេះ ខណៈទីក្រុងព្រុចសែល កំណត់ឱសានវាទត្រឹមខែតុលា ឱ្យប៉េកាំងដោះស្រាយវិវាទនានា ចំពោះមុខក្តីបារម្ភកាន់តែខ្លាំង ពាក់ព័ន្ធអតិរេកពាណិជ្ជកម្មរបស់ចិន ដែលមានទំហំជាង ១ទ្រីលានដុល្លារ៕