(Reuters)៖ តម្លៃប្រេងឆៅ នាថ្ងៃពុធ ទី៥ ខែសីហា ហាក់មានស្ថិរភាព បន្ទាប់ពីបានឡើងចុះក្នុងការជួញដូរ ២វគ្គមុន ខណៈដែលក្រុមអ្នកវិនិយោគ រង់ចាំមើលកិច្ចខិតខំប្រឹងប្រែង ដើម្បីបញ្ចប់សង្រ្គាមរវាងអាមេរិក និងអ៉ីរ៉ង់ ហើយស្តារចរាចរណ៍នៅច្រកសមុទ្រ Hormuz ឡើងវិញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ប្រេងឆៅប្រភេទ Brent មានតម្លៃជិត ៨០ដុល្លារក្នុងមួយបារ៉ែល រីឯប្រេងឆៅអាមេរិក West Texas Intermediate មានតម្លៃជិត ៧៦ដុល្លារក្នុងមួយបារ៉ែល។ កាលពីថ្ងៃអង្គារ ប្រទេសកាតាបានឱ្យដឹងថា ភាគីសម្របសម្រួលកំពុងសម្រេចបានវឌ្ឍនភាព ក្នុងកិច្ចខិតខំប្រឹងប្រែងបញ្ចប់សង្គ្រាម ដែលបានជួយទាញតម្លៃប្រេងឱ្យធ្លាក់ចុះ បើទោះជាទីក្រុងតេហេរ៉ង់ បដិសេធការអះអាងរបស់ប្រធានាធិបតីអាមេរិក ដូណាល់ ត្រាំ ដែលថាការចរចាកំពុងដំណើរការក៏ដោយ។

អ្នកវិភាគមកពីក្រុមហ៊ុន IG បានលើកឡើងថា ចំណុចចម្រូងចម្រាសធំ ដូចជាស្ថិតនៅត្រង់ថា តើអ៉ីរ៉ង់នឹងបន្តទទូចចង់បានសិទ្ធិគ្រប់គ្រងមួយកម្រិតលើច្រកសមុទ្រ Hormuz ហើយថាតើសហរដ្ឋអាមេរិក នឹងនៅតែរក្សាជំហររបស់ខ្លួន ដោយបដិសេធមិនទទួលយកលទ្ធផលបែបនោះដែរ ឬយ៉ាងណា៕