(ហ្សឺណែវ)៖ កម្មវិធីស្បៀងអាហារពិភពលោក ហៅកាត់ WFP របស់អង្គការសហប្រជាជាតិ បានឱ្យដឹងថា បញ្ហាកង្វះអាហារូបត្ថម្ភកុមារ នៅក្នុងប្រទេសអាហ្វហ្គានីស្ថាន បានឈានដល់កម្រិតធ្ងន់ធ្ងរ ហើយការខ្វះខាតជំនួយកំពុងបង្ខំឱ្យបុគ្គលិកសុខាភិបាល មិនអាចផ្តល់សេវាដល់កុមារ និងម្តាយរាប់លាននាក់ ដែលស្មើនឹង ៦នាក់ក្នុងចំណោម ៧នាក់នៃអ្នកដែលកំពុងត្រូវការជំនួយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី៥ ខែសីហា ឆ្នាំ២០២៦។

នាយក WFP ប្រចាំអាហ្វហ្គានីស្ថាន លោក John Aylieff បានប្រាប់អ្នកសារព័ត៌មាននៅទីក្រុងហ្សឺណែវ ថាកុមារដែលមានរាងកាយស្គមស្គាំង ដែលជាទម្រង់ដ៏គ្រោះថ្នាក់បំផុតនៃកង្វះអាហារូបត្ថម្ភ បានឈានដល់កម្រិតធ្ងន់ធ្ងរ នៅក្នុងខេត្តចំនួនមួយភាគបីនៃប្រទេសអាហ្វហ្គានីស្ថាន ខណៈចំនួនកុមារដែលត្រូវបានបញ្ជូនទៅកាន់មណ្ឌលសុខភាព បានកើនឡើងយ៉ាងគំហុក។

«នេះជាវិបត្តិមួយដែលចេះតែធ្ងន់ធ្ងរពីមួយថ្ងៃទៅមួយថ្ងៃ ហើយវាគួរឱ្យសង្វេគណាស់ ដែលយើងមិនអាចគ្រប់គ្រងបាន»។ នេះជាការគូសបញ្ជាក់របស់លោក Aylieff ដោយបន្ថែមថាប្រហែល ៨០ភាគរយនៃករណីធ្ងន់ធ្ងរបំផុត កើតមានលើកុមារអាយុក្រោម ២ឆ្នាំ ដោយក្នុងនោះមានកុមារជាច្រើន ត្រូវបាននាំមកកាន់គ្លីនិកយឺតពេលពេក មិនអាចជួយសង្គ្រោះបាន។

ដោយឡែក តម្លៃម្ហូបអាហារចម្បងៗបានកើនពី២០ ទៅ៣០ភាគរយ ខណៈប្រជាជនអាហ្វហ្គានីស្ថានជិត ១៤លាននាក់ កំពុងប្រឈមនឹងភាពអត់ឃ្លានធ្ងន់ធ្ងរ។ ទោះជាការប្រមូលផលកសិកម្មល្អប្រសើរក្នុងឆ្នាំនេះ បានផ្តល់ក្តីសង្ឃឹមខ្លះ ក៏ផលទាំងនោះត្រូវបានបាត់បង់ទៅវិញដោយសារតែសម្ពាធសេដ្ឋកិច្ច ការវិលមកវិញនៃប្រជាជនក្នុងចំនួនដ៏ច្រើន និងបញ្ហាកាត់បន្ថយជំនួយ។ តាមលោក Aylieff ប្រជាជនអាហ្វហ្គានីស្ថានជិត ៦លាននាក់ ត្រូវបានបញ្ជូនត្រឡប់មកវិញដោយបង្ខំពីប្រទេសជិតខាង ក្នុងរយៈពេល ៣ឆ្នាំកន្លងមក ចាប់តាំងពីគោលនយោបាយនិរទេស ត្រូវបានអនុវត្តនាចុងឆ្នាំ២០២៣ ដែលបង្កជាសម្ពាធថែមទៀតលើវិស័យការងារ និងសេវាសាធារណៈរបស់ប្រទេសនេះ៕