(កូឡុំបូ)៖ អាជ្ញាធរស្រីលង្កាបានប្រកាសនៅថ្ងៃសុក្រថា ករណីកុប្បកម្មចំនួន ២ ករណី នៅក្នុងពន្ធនាគារ បានបណ្តាលឱ្យអ្នកទោស ៣នាក់បាត់បង់ជីវិត និង ២៣នាក់ទៀតរងរបួស។ នេះជាផ្នែកមួយនៃភាពវឹកវរដែលកំពុងរីករាលដាលទូទាំងប្រព័ន្ធពន្ធនាគារស្រីលង្កា ដែលកំពុងប្រឈមនឹងបញ្ហាចង្អៀតណែនយ៉ាងធ្ងន់ធ្ងរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

រដ្ឋមន្ត្រីសន្តិសុខសាធារណៈ លោក អានាន់ដា វីជេប៉ាឡា បានបញ្ជាក់ថា កុប្បកម្មទីមួយនៅពន្ធនាគារ New Magazine ក្នុងទីក្រុងកូឡុំបូ (Colombo) បានសម្លាប់អ្នកទោសម្នាក់ និងរបួស ១០នាក់។ ចំណែកកុប្បកម្មទីពីរនៅពន្ធនាគារ Kuruwita បានសម្លាប់អ្នកទោស ២នាក់ និងរបួស ១៤នាក់។ ទន្ទឹមនឹងនេះ ក៏មានភាពវឹកវរមួយទៀតនៅពន្ធនាគារទីក្រុង Negombo ផងដែរ ប៉ុន្តែត្រូវបានប៉ូលិសប្រើហ្គាសបង្ហូរទឹកភ្នែកបំបែកហ្វូងតវ៉ា។

បច្ចុប្បន្ន កម្លាំងពិសេសបានគ្រប់គ្រងស្ថានការណ៍បានទាំងស្រុងហើយ ខណៈលោករដ្ឋមន្ត្រីសង្ស័យថា ព្រឹត្តិការណ៍ផ្ទួនៗគ្នានេះអាចមានការរៀបចំទុកជាមុន។ គួររំលឹកថា កាលពីដើមខែកក្កដា ការប៉ះទង្គិចគ្នានៅពន្ធនាគារក្នុងទីក្រុង Negombo នេះ ក៏ធ្លាប់បានសម្លាប់មន្ត្រីពន្ធនាគារ ១០នាក់ និងអ្នកទោស ២០នាក់រួចមកហើយ។

បញ្ហាភាពចង្អៀតណែន គឺជាវិបត្តិជាប្រព័ន្ធនៅក្នុងប្រទេសស្រីលង្កា ដោយពន្ធនាគារដែលសង់សម្រាប់មនុស្សត្រឹម ១១,០០០នាក់ បែរជាត្រូវផ្ទុកអ្នកទោសរហូតដល់ជាង ៤១,០០០នាក់ ដែលភាគច្រើនជាអ្នករង់ចាំការកាត់ក្តីបទល្មើសគ្រឿងញៀន។ ដើម្បីដោះស្រាយវិបត្តិនេះ រដ្ឋាភិបាលកំពុងរៀបចំកែប្រែរដ្ឋធម្មនុញ្ញ ដើម្បីពន្យារអាណត្តិចៅក្រម ក្នុងគោលបំណងពន្លឿនការកាត់ក្តីសំណុំរឿងរាប់លានដែលកំពុងកកស្ទះ និងជួយកាត់បន្ថយចំនួនអ្នកទោស៕