(ប៉េកាំង)៖ ប្រព័ន្ធផ្សព្វផ្សាយរដ្ឋចិន CCTV បានរាយការណ៍ថា គ្រោះរញ្ជួយដីកម្រិត ៤,៩រ៉ិចទ័រ បានវាយប្រហារខេត្តស៊ីឈួន (Sichuan) ភាគនិរតីប្រទេសចិន នៅថ្ងៃសុក្រ ដែលបណ្តាលឱ្យមនុស្សម្នាក់បាត់បង់ជីវិត និង ៦នាក់ផ្សេងទៀតរងរបួសស្រាល។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

យោងតាមមជ្ឈមណ្ឌលបណ្តាញរញ្ជួយដីចិន គ្រោះរញ្ជួយដីនេះបានវាយប្រហារស្រុកកៅ (Gao) នៃខេត្តស៊ីឈួន នៅវេលាម៉ោងប្រមាណ ១រសៀល ក្នុងជម្រៅរាក់ត្រឹមតែ ៦គីឡូម៉ែត្រប៉ុណ្ណោះ។ ទូរទស្សន៍ CCTV បានបញ្ជាក់ថា ជនរងគ្រោះម្នាក់ដែលស្លាប់នោះ គឺបណ្តាលមកពីជញ្ជាំងអគារខាងក្រៅបាក់សង្កត់ អំឡុងពេលរូបគេកំពុងរត់រកកន្លែងសុវត្ថិភាព។

បច្ចុប្បន្ន អាជ្ញាធរក្នុងតំបន់បានដាក់ចេញនូវវិធានការឆ្លើយតបគ្រោះអាសន្នជាបន្ទាន់ និងបានបញ្ជូនកងកម្លាំងចុះទៅកាន់ចំណុចកណ្តាលនៃការរញ្ជួយ ដើម្បីវាយតម្លៃស្ថានភាព និងការខូចខាតជាក់ស្តែង៕