(ម៉ាឌ្រីដ)៖ ប្រទេសអេស្ប៉ាញ នៅថ្ងៃសុក្រ បានព្រមានថានឹងដាក់ចេញនូវវិធានការសងសឹកវិញ ទៅលើអ្នកដំណើរមកពីប្រទេសអ៊ីតាលី ប្រសិនបើរដ្ឋាភិបាលទីក្រុងរ៉ូម មិនព្រមដកការត្រួតពិនិត្យព្រំដែន ដែលខ្លួនបានដាក់ចេញកាលពីសប្តាហ៍មុននោះទេ ត្រឹមថ្ងៃអាទិត្យនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

គួររំលឹកថា អ៊ីតាលីបានសម្រេចចិត្តរឹតបន្តឹងការត្រួតពិនិត្យលើអ្នកដំណើរមកពីអេស្ប៉ាញ បន្ទាប់ពីមានលំហូរជនចំណាកស្រុករាប់ម៉ឺននាក់ សម្រុកចូលទៅកាន់ដែនដីស្វយ័តសេអូតា (Ceuta) របស់អេស្ប៉ាញយ៉ាងគំហុក។ រដ្ឋាភិបាលអេស្ប៉ាញបានរិះគន់យ៉ាងខ្លាំងចំពោះចំណាត់ការរបស់អ៊ីតាលី ដោយចាត់ទុកថាជាទង្វើ «គ្មានហេតុផលត្រឹមត្រូវ ផ្ទុយពីផលប្រយោជន៍របស់សហភាពអឺរ៉ុប (EU) និងជាការរើសអើងប្រឆាំងនឹងប្រជាជនអេស្ប៉ាញ»។

ទោះជាយ៉ាងណា ភាគីអ៊ីតាលីមិនទាន់មានការឆ្លើយតប ឬធ្វើអត្ថាធិប្បាយភ្លាមៗជុំវិញការព្រមានចុងក្រោយរបស់អេស្ប៉ាញនេះនៅឡើយទេ៕