(វ៉ាស៊ីនតោន)៖ ការវាយតម្លៃថ្មីៗនេះរបស់ទីភ្នាក់ងារស៊ើបការណ៍សម្ងាត់អាមេរិក បានបញ្ជាក់ថាប្រធានាធិបតីរុស្ស៉ី លោក វ្ល៉ាឌីមៀ ពូទីន អាចនឹងព្យាយាមធ្វើតេស្តលើសាមគ្គីភាព និងការប្ដេជ្ញាចិត្តរបស់បក្សសម្ព័ន្ធយោធា NATO​ តាមរយៈការវាយប្រហារទ្រង់ទ្រាយតូចលើប្រទេសជាសមាជិកណាមួយ នៅប៉ុន្មានឆ្នាំខាងមុខ។ នេះបើតាមការចេញផ្សាយដោយសារព័ត៌មាន CNN នៅថ្ងៃសៅរ៍ ទី៨ ខែសីហា ឆ្នាំ២០២៦។

ដោយផ្អែកលើប្រភពដែលបានដឹងពីការវាយតម្លៃខាងលើក្នុងលក្ខខណ្ឌមិនបញ្ចេញឈ្មោះ CNN បានឱ្យដឹងទៀតថាការវាយតម្លៃរបស់ទីភ្នាក់ងារស៊ើបការណ៍សម្ងាត់អាមេរិកបានគូសបញ្ជាក់ពីសេណារីយ៉ូជាច្រើនដែលរុស្ស៉ីអាចនឹងបង្កើនជម្លោះ មានចាប់ពីការវាយប្រហារសាយប័រ (cyberattack) រហូតដល់ការវាយប្រហារលុកលុយទ្រង់ទ្រាយតូច ក្នុងគោលបំណងធ្វើតេស្ដលើសាមគ្គីភាព និងការប្ដេជ្ញាចិត្តរបស់ NATO ចំពោះមាត្រា ៥។ មាត្រា៥ បានចែងថាការវាយប្រហារលើសមាជិកណាមួយរបស់ NATO នឹងត្រូវបានចាត់ទុកថាជាការវាយប្រហារលើបក្សសម្ព័ន្ធយោធានេះទាំងមូល ដែលតម្រូវឱ្យមានការឆ្លើយតបរបស់សម្ព័ន្ធមិត្តទាំងអស់។ ប៉ុន្តែការវាយប្រហារទ្រង់ទ្រាយតូចនោះគឺលោក ពូទីនមិនមានចេតនាឆ្លងខ្សែបន្ទាត់ក្រហមដែលតម្រូវ​សម្ព័ន្ធមិត្ត NATO ទាំងអស់ចាត់វិធានការឆ្លើយតបពេញទំហឹងនោះទេ។

ខណៈថាតើវានឹងកើតឡើងនៅពេលណា និងថាតើលោក ពូទីន អាចនឹងធ្វើសកម្មភាពយ៉ាងដូចម្ដេចស្ថិតនៅក្រោមភាពមិនច្បាស់លាស់ ប្រភពមួយបានប្រាប់ CNN ថាមេដឹកនាំរុស្ស៉ីទំនងជានឹងបង្កើនជម្លោះក្នុងទម្រង់មួយចំនួនដោយកំណត់គោលដៅលើរដ្ឋក្នុងតំបន់បាល់ទិក ឬប៉ូឡូញ។ ក្រុមមន្ត្រីអាមេរិក និង NATO ជឿថាលោក ពូទីនប្រហែលជាជ្រើសរើសយកការបង្កើនជម្លោះប្រឆាំងនឹង NATO ប្រសិនបើកងទ័ពរុស្ស៉ីនៅតែមិនទាន់អាចសម្រេចបានភាពរីកចម្រើនធំដុំក្នុងសង្រ្គាមជាមួយអ៊ុយក្រែន ហើយលោកអាចនឹងរើសយកការធ្វើសកម្មភាពចន្លោះពីឥលូវនេះ ឬនៅប៉ុន្មានឆ្នាំខាងមុខ។

លោក Martin O’Donnell ជាអ្នកនាំពាក្យជាន់ខ្ពស់ម្នាក់របស់ NATO បានបដិសេធធ្វើការអត្ថាធិប្បាយលើការវាយតម្លៃរបស់ទីភ្នាក់ងារស៊ើបការណ៍សម្ងាត់អាមេរិក ប៉ុន្តែបាននិយាយថា NATO តែងតែត្រៀមខ្លួនជានិច្ចចំពោះគ្រប់សេណារីយ៉ូទាំងអស់។

គួរបញ្ជាក់ថា ចាប់តាំងពីសង្រ្គាមអ៊ុយក្រែនផ្ទុះឡើងកាលពីឆ្នាំ២០២២មក រុស្ស៉ីត្រូវបានរាយការណ៍ថាបានទន្ទ្រាញចូលដែនអាកាសរបស់រដ្ឋជាសមាជិក NATO ជាច្រើនលើក។ តួយ៉ាង កាលពីខែឧសភាកន្លងទៅ ដ្រូនមួយគ្រឿងរបស់រុស្ស៉ីបានវាយប្រហារលើអគារលំនៅដ្ឋានមួយក្នុងប្រទេសរូម៉ានីដោយបណ្ដាលឱ្យមនុស្ស ២នាក់រងរបួស ក្នុងពេលដែលកងកម្លាំងរុស្ស៉ីបើកការវាយប្រហារលើអ៊ុយក្រែន។ កាលពីខែកញ្ញា ឆ្នាំ២០២៥ យន្ដហោះចម្បាំង NATO ក៏បានបាញ់ទម្លាក់ដ្រូនរុស្ស៉ីជាច្រើនគ្រឿងដែលបានបំពានចូលដែនអាកាសប៉ូឡូញ អំឡុងការវាយប្រហារលើអ៊ុយក្រែនផងដែរ។

បន្ថែមពីលើនេះ គឺក្នុងសប្ដាហ៍នេះតែម្ដង មន្ត្រីអាមេរិកម្នាក់ក្នុងតំបន់អឺរ៉ុបបានប្រាប់ CNN​ ថាសហរដ្ឋអាមេរិកបានវាយតម្លៃថាដ្រូនមួយគ្រឿងមានផ្ទុកគ្រឿងផ្ទុះដែលត្រូវបានប្រទះឃើញនៅឯអាកាសយានដ្ឋានមួយក្នុងប្រទេសអាល្លឺម៉ង់ កាលពីយប់ថ្ងៃពុធកន្លងទៅ គឺជាដ្រូនរបស់ទីភ្នាក់ងារស៊ើបការណ៍សម្ងាត់រុស្ស៉ី។ តែរុស្ស៉ីបានទាត់ចោលការអះអាងនេះ៕