(វ៉ាស៉ីនតោន)៖ កាលពីថ្ងៃសុក្រ ទី៧ ខែសីហា សហរដ្ឋអាមេរិក បានដាក់ទណ្ឌកម្មលេីបណ្តាញជួញដូររូបិយប័ណ្ណគ្រីបតូមួយដែលដំណើរការឆ្លងកាត់រដ្ឋជាច្រើនដោយគ្មានអាជ្ញាប័ណ្ណ ដោយចោទប្រកាន់ថាបណ្តាញនេះបានសម្របសម្រួលប្រតិបត្តិការរូបិយប័ណ្ណគ្រីបតូតម្លៃរាប់លានដុល្លារ ឱ្យកងកម្លាំងឆ្មាំបដិវត្តន៍អ៉ីរ៉ង់ (IRGC) និងក្រុមផ្សេងទៀតដែលមានទំនាក់ទំនងជាមួយរដ្ឋាភិបាលអ៉ីរ៉ង់។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។

ការកំណត់នេះធ្វើឡើងបន្ទាប់ពីការស៉េីអង្កេតរបស់ Reuters ចេញផ្សាយថ្ងៃទី ៣១ ខែកក្កដា ដែលរកឃើញថាក្រុមហ៊ុនប្តូរប្រាក់គ្រីបតូ Shelbit មានមូលដ្ឋាននៅទីក្រុងឌូបៃ គឺជាចំណុចកណ្តាលនៃបណ្តាញគេចវេះពីការដាក់ទណ្ឌកម្មលើអ៉ីរ៉ង់ ដែលមានទំហំទឹកប្រាក់​ ៤ពាន់លានដុល្លារ។ Shelbit បានធ្វើប្រតិបត្តិការផ្ទេរប្រាក់គ្រីបតូក្នុងនាមធនាគារកណ្តាលអ៉ីរ៉ង់ និងបណ្តាញល្បែងស៉ីសងតាមអនឡាញខុសច្បាប់ដ៏ធំបំផុតមួយរបស់ពិភពលោក ព្រមទាំងផ្ទេរទៅកាន់អាសយដ្ឋានដែលរដ្ឋាភិបាលអ៉ីស្រាអែល ក៏បានរកឃើញថាមានទំនាក់ទំនងជាមួយ IRGC ផងដែរ។

ក្រសួងហិរញ្ញវត្ថុអាមេរិក ក៏បានដាក់ទណ្ឌកម្មលើលោក Siavash Kayvanpour ដែលជាជនជាតិអ៉ីរ៉ង់រស់នៅក្រៅប្រទេស និងជាស្ថាបនិកក្រុមហ៊ុន Shelbit ព្រមទាំងបណ្តាញក្រុមហ៊ុនផ្សេងទៀតផងដែរ សម្រាប់ការផ្តល់ការគាំទ្រផ្នែកសម្ភារៈដល់ IRGC និងក្រុមហ៊ុន Nobitex ដែលជាផ្សារជួញដូររូបិយប័ណ្ណគ្រីបតូដ៏ធំបំផុតរបស់ប្រទេសអ៉ីរ៉ង់។ Nobitex បានរងទណ្ឌកម្មអាមេរិក​ កាលពីថ្ងៃទី២ ខែមិថុនា សម្រាប់ការអនុញ្ញាតឱ្យរដ្ឋាភិបាលអ៉ីរ៉ង់គេចវេះពីការរឹតបន្តឹងរបស់ប្រទេសលោកខាងលិច។

រដ្ឋមន្រ្តីហិរញ្ញវត្ថុអាមេរិក លោក Scott Bessent គូសបញ្ជាក់ថា «ក្រសួងនឹងតាមប្រមាញ់ និងកម្ទេចបណ្តាញហិរញ្ញវត្ថុខុសច្បាប់ដែលជួយទ្រទ្រង់របបនេះឱ្យនៅបន្តរស់រានបាន»។ ក្រុមហ៊ុន Shelbit និងលោក​ Kayvanpour មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ៕