(សូហ្វ៉ីយ៉ា)៖ កាលពីថ្ងៃសៅរ៍ ទី៨ ខែសីហា ឆ្នាំ២០២៦ រដ្ឋមន្ត្រីការបរទេសប៊ុលហ្ការី បានកោះហៅឯកអគ្គរដ្ឋទូតអ៊ុយក្រែន បន្ទាប់ពីយន្តហោះដ្រូនផ្ទុកគ្រឿងផ្ទុះមួយគ្រឿ ងបានធ្លាក់នៅក្នុងប្រទេសរបស់ខ្លួន ក្បែរបំពង់បង្ហូរឧស្ម័នយុទ្ធសាស្ត្រមួយកន្លែង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ការិយាល័យរដ្ឋមន្រ្តីការបរទេសប៊ុលហ្ការី បាននិយាយថា ជំនួបរវាងភាគីទាំង២ នឹងប្រព្រឹត្តទៅនៅថ្ងៃចន្ទដើមសប្តាហ៍ក្រោយនេះ។ ក្រសួងការពារជាតិប៊ុលហ្ការី បានឱ្យដឹងថា យន្តហោះដ្រូនដែលបានធ្លាក់នៅកៀកបំពង់បង្ហូរឧស្ម័ន ក្បែរព្រំដែនជាមួយរូម៉ានី គឺជាប្រភេទដ្រូន ដែលត្រូវបានប្រើប្រាស់យ៉ាងទូលំទូលាយ ដោយយោធាអ៊ុយក្រែន។

ដោយឡែក ទីក្រុងកៀវ បានចេញមុខអះអាងក្នុងថ្ងៃដដែល ខ្លួនមិនបានកំណត់គោលដៅលើប៊ុលហ្ការីនោះទេ បន្ទាប់ពីយន្តហោះដ្រូនប្រភេទ ដែលប្រើប្រាស់ដោយកងទ័ពអ៊ុយក្រែន បានធ្លាក់នៅក្នុងប្រទេសប៊ុលហ្ការី ដោយសន្យាថា នឹងបកស្រាយឱ្យបានច្បាស់ពីកាលៈទេសៈនៃឧប្បត្តិហេតុនេះ។

លោក Georgiy Tykhyi អ្នកនាំពាក្យក្រសួងការបរទេសអ៊ុយក្រែន បានលើកឡើងថា «យើងកំពុងទាក់ទងយ៉ាងជិតស្និទ្ធជាមួយភាគីប៊ុលហ្ការី ដើម្បីបំភ្លឺកាលៈទេសៈជាក់ស្តែង។ យើងអាចនិយាយដោយភាពប្រាកដប្រជាថា កងកម្លាំងប្រដាប់អាវុធអ៊ុយក្រែន មិនបានបញ្ជូនឧបករណ៍ណាមួយ ឆ្ពោះទៅកាន់ប៊ុលហ្ការីដោយចេតនានោះទេ»៕