(អង់ការ៉ា)៖ រដ្ឋមន្ត្រីការបរទេសតួកគីយ៉េ លោក Hakan Fidan បាននិយាយកាលពីថ្ងៃសៅរ៍ ទី៨ ខែសីហា ឆ្នាំ២០២៦ថា កិច្ចព្រមព្រៀងការពារជាតិ ដែលត្រូវបានចុះហត្ថលេខារវាងតួកគីយ៉េ ប៉ាគីស្ថាន និងអារ៉ាប៊ីសាអូឌីត មានលក្ខណៈបច្ចេកទេសដូចគ្នានឹងកិច្ចព្រមព្រៀងការពារគ្នាទៅវិញទៅមក ក្រោមមាត្រា៥ របស់អង្គការ NATO យ៉ាងដូច្នោះ ហើយលោកបានបន្ថែមថា កិច្ចព្រមព្រៀងនេះមិនមានគោលដៅប្រឆាំងប្រទេសអ៉ីរ៉ង់ឡើយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Fidan ក៏បានបញ្ជាក់ដែរថា ប្រធានាធិបតីតួកគីយ៉េ លោក Tayyip Erdogan ចង់ឃើញសម្ព័ន្ធភាពនេះ ត្រូវបានពង្រីកបន្ថែមទៀត ហើយអេហ្ស៊ីបគឺជាបេក្ខភាពមួយដែលអាចនឹងចូលរួម ក្នុងចំណោមប្រទេសដទៃទៀត។ ប្រទេសទាំង៣ ដែលសុទ្ធតែជាប្រទេសមានឥទ្ធិពលធំក្នុងតំបន់ បានចុះហត្ថលេខាលើ «កិច្ចព្រមព្រៀងការពារជាតិរួមទីក្រុង Mecca» កាលពីថ្ងៃសុក្រសប្តាហ៍នេះ ចំពោះមុខការព្រួយបារម្ភ ជុំវិញជម្លោះឆាបឆេះឡើងក្នុងតំបន់ ដែលបាននាំឱ្យមានការវាយប្រហាររបស់អ៉ីរ៉ង់ ទៅលើបណ្តាប្រទេសនាំចេញប្រេង នៅតំបន់ឈូងសមុទ្រអារ៉ាប់។ នៅក្នុងសេចក្តីថ្លែងការណ៍រួម ប្រទេសទាំង៣ បាននិយាយថា កិច្ចព្រមព្រៀងនេះមានបំណងពង្រឹងការទប់ស្កាត់រួមគ្នាប្រឆាំងនឹងអំពើឈ្លានពានណាមួយ ហើយចែងថាការវាយប្រហារដោយអាវុធ ប្រឆាំងនឹងប្រទេសណាមួយក្នុងចំណោមប្រទេសទាំងបី នឹងត្រូវចាត់ទុកថាជាការវាយប្រហារលើទាំងអស់គ្នា។

ថ្លែងទៅកាន់ទីភ្នាក់ងារសារព័ត៌មានរដ្ឋ Anadolu លោក Fidan បាននិយាយថាសម្ព័ន្ធភាពថ្មីនេះ មិនមានគោលដៅប្រឆាំងអ៉ីរ៉ង់ ឬប្រទេសផ្សេងទៀតឡើយ ប៉ុន្តែបម្រើជាការប្តេជ្ញារួម ដើម្បីគាំទ្រសន្តិសុខរបស់សម្ព័ន្ធមិត្តទាំងបី។ លោកបានបន្ថែមថា សម្ព័ន្ធមិ ត្តនឹងសម្រេចតាមរយៈការពិគ្រោះយោបល់អំពីកម្រិត ទម្រង់ និងទំហំនៃការគាំទ្រដែលពួកគេនឹងស្នើសុំ ក្នុងករណីមានការវាយប្រហារ ប៉ុន្តែគ្មានប្រទេសណាមួយ នឹងត្រូវបានចាត់ទុកថាជាការគំរាមកំហែងឡើយ ដរាបណាប្រទេសជាសមាជិក មិនរងការវាយប្រហារ។

តួកគីយ៉េ ដែលមានកងទ័ពធំជាងគេទីពីរនៅ NATO បាននិយាយថា កិច្ចព្រមព្រៀងនេះ បើកចំហសម្រាប់ការពង្រីកទៅកាន់ប្រទេសផ្សេងទៀតក្នុងតំបន់ ហើយមិនស្វែងរកការជំនួសសម្ព័ន្ធភាព ដែលមានស្រាប់ណាមួយឡើយ។ ក្នុងប៉ុន្មានខែថ្មីៗនេះ តួកគីយ៉េ អារ៉ាប៊ីសាអូឌីត ប៉ាគីស្ថាន និងអេហ្ស៊ីប បានបង្កើតក្រុមមួយ ដើម្បីដោះស្រាយបញ្ហាតំបន់ ជាពិសេសសង្រ្គាមលើអ៊ីរ៉ង់។ តួកគីបាននិយាយថា ក្រុមនេះ ដែលហៅថា R4 មានគោលបំណងពង្រឹង ភាពជាដៃគូរបស់ខ្លួន តាមរយៈយន្តការជាក់លាក់។ លោក Fidan ក៏បាននិយាយផងដែរថា តួកគីយ៉េ គួរតែចូលរួមក្នុងក្រុមចម្រុះអន្តរជាតិ ដើម្បីការពារការដឹកជញ្ជូននៅសមុទ្រក្រហម ពីការវាយប្រហាររបស់ក្រុមហ៊ូទីយេម៉ែន ព្រោះសុវត្ថិភាពនៃការដឹកជញ្ជូននៅទីនោះ ទាក់ទងនឹងផលប្រយោជន៍របស់ទីក្រុងអង់ការ៉ា៕