(តៃប៉ិ)៖ ទីភ្នាក់ងារព័ត៌មានផ្លូវការ Central News Agency បានរាយការណ៍ នៅថ្ងៃអាទិត្យ ទី៩ ខែសីហា ឆ្នាំ២០២៦ ថា គណៈរដ្ឋមន្ត្រីតៃវ៉ាន់ នឹងស្នើបង្កើនការចំណាយលើវិស័យការពារជាតិប្រចាំឆ្នាំ ដល់១៦ភាគរយ សម្រាប់ឆ្នាំ២០២៧ ដែលនឹងលើសពី១ទ្រីលានដុល្លារតៃវ៉ាន់ (៣១ពាន់លានដុល្លារអាមេរិក) ជាលើកដំបូង ខណៈទីក្រុងតៃប៉ិកំពុងពង្រឹងកម្លាំងយោធារបស់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ការផ្លាស់ប្តូរនេះកើតឡើងស្របពេលប្រទេសចិន ដែលចាត់ទុកតៃវ៉ាន់ជាទឹកដីរបស់ខ្លួន បានបង្កើនសម្ពាធយោធានិងនយោបាយ ក្នុងរយៈពេលប៉ុន្មានឆ្នាំចុងក្រោយនេះ ដើម្បីទាមទារអធិបតេយ្យលើតៃវ៉ាន់ ប៉ុន្តែទន្ទឹមគ្នា តៃវ៉ាន់ក៏ប្រឈមនឹងការអំពាវនាវពីសំណាក់ទីក្រុងវ៉ាស៊ីនតោន ឱ្យចំណាយកាន់តែច្រើន លើវិស័យការពារជាតិរបស់ខ្លួនផងដែរ ដែលស្រដៀងនឹងសម្ពាធរបស់សហរដ្ឋអាមេរិកលើអឺរ៉ុប ហើយជាអ្វីដែលមេដឹកនាំតៃវ៉ាន់ លោក Lai Ching-te បានស្វាគមន៍ទទួលយក។

ទីភ្នាក់ងារព័ត៌មានផ្លូវការរបស់តៃវ៉ាន់ Central News Agency បានឱ្យដឹងថា សំណើថវិកាជាង ១,១ទ្រីលានដុល្លារតៃវ៉ាន់ ដែលនឹងត្រូវបង្ហាញនៅថ្ងៃទី២០ ខែសីហា រួមបញ្ចូលទាំងថវិកាសម្រាប់កងឆ្មាំសមុទ្រ អតីតយុទ្ធជន និងគម្រោងពិសេសៗ ហើយនឹងលើសពី ៣ភាគរយ នៃផលិតផលក្នុងស្រុកសរុប (GDP) ដូចឆ្នាំ២០២៦ដែរ។ តួលេខលម្អិតជាងនេះថែមទៀត ត្រូវរង់ចាំកិច្ចប្រជុំគណៈរដ្ឋមន្ត្រីចុងក្រោយ។

រដ្ឋាភិបាលតៃវ៉ាន់ ដាក់ការធ្វើទំនើបកម្មយោធា ជាគោលនយោបាយគន្លឹះ ហើយបានប្តេជ្ញាជាបន្តបន្ទាប់ ក្នុងការចំណាយកាន់តែច្រើនលើវិស័យការពារជាតិ រួមមានទាំងការអភិវឌ្ឍនាវាមុជទឹកផលិតនៅតៃវ៉ាន់ផ្ទាល់ ដោយសារតែការកើនឡើងការគំរាមកំហែងពីប្រទេសចិន។ កងកម្លាំងយោធារបស់ចិន បន្តធ្វើប្រតិបត្តិការស្ទើរតែរាល់ថ្ងៃ នៅជុំវិញតៃវ៉ាន់ និងធ្វើសមយុទ្ធយោធាជាទៀងទាត់ ដែលចុងក្រោយបំផុត គឺកាលពីចុងខែធ្នូ ឆ្នាំ២០២៥។ បច្ចុប្បន្ន តៃវ៉ាន់កំពុងស្ថិតក្នុងធ្វើការសមយុទ្ធយោធាទ្រង់ទ្រាយធំប្រចាំឆ្នាំរបស់ខ្លួន ហៅថា Han Kuang។

គួរបញ្ជាក់ថា ប្រទេសចិន ក៏កំពុងធ្វើទំនើបកម្មកងកម្លាំងប្រដាប់អាវុធយ៉ាងឆាប់រហ័សផងដែរ ជាមួយនាវាផ្ទុកយន្តហោះ យន្តហោះចម្បាំងបំបាំងកាយ និងមីស៊ីលថ្មីៗ។ កាលពីខែមីនា ប្រទេសចិនបានបង្ហាញការកើនឡើង ៧ភាគរយ នៃការចំណាយលើវិស័យការពារជាតិរបស់ខ្លួន សម្រាប់ឆ្នាំនេះ ដល់ ១,៩១ទ្រីលានយាន់ (២៨៣,០៨ពាន់លានដុល្លារ)។ ចិនបដិសេធបើកកិច្ចសន្ទនាជាមួយលោក Lai ដោយចាត់ទុក លោកជាបុគ្គលផ្តាច់ខ្លួនដ៏គ្រោះថ្នាក់។ លោក Lai ប្រកាន់ជំហរថា មានតែប្រជាជនតៃវ៉ាន់ផ្ទាល់ប៉ុណ្ណោះ ដែលអាចសម្រេចអនាគតរបស់ពួកគេបាន៕