(ឌូបៃ)៖ ប្រទេសអ៊ីរ៉ង់បានប្រកាសនៅថ្ងៃអាទិត្យថា កិច្ចព្រមព្រៀងជាមួយប្រទេសអូម៉ង់ ស្តីពីការរៀបចំខ្សែផ្លូវនាវាចរណ៍ថ្មីនៅច្រកសមុទ្រហ័រមូស​ កំពុងស្ថិតក្នុង «ដំណាក់កាលចុងក្រោយ» ប៉ុន្តែបានព្រមានថា ច្រកសមុទ្រនេះនឹងត្រូវបើកដំណើរការវិញ លុះត្រាតែសហរដ្ឋអាមេរិកបំពេញតាមលក្ខខណ្ឌដទៃទៀតរួចរាល់ជាមុនសិន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

រដ្ឋមន្ត្រីការបរទេសអ៊ីរ៉ង់ លោក អាប់បាស អារ៉ាក់ជី (Abbas Araqchi) បានបញ្ជាក់ថា កិច្ចព្រមព្រៀងនេះគ្រាន់តែរៀបចំផ្លូវទឹកថ្មីសម្រាប់ពេលអនាគតប៉ុណ្ណោះ ហើយអ៊ីរ៉ង់នឹងមិនចូលតុចរចាដោយផ្ទាល់ជាមួយអាមេរិកជាដាច់ខាត ដរាបណាទីក្រុងវ៉ាស៊ីនតោន នៅតែបន្តរំលោភកិច្ចព្រមព្រៀងបណ្តោះអាសន្ន។ បច្ចុប្បន្ន ការទាក់ទងគ្នាគឺធ្វើឡើងតាមរយៈអ្នកសម្របសម្រួលប៉ុណ្ណោះ។

ការប្រកាសនេះធ្វើឡើងបន្ទាប់ពីមន្ត្រីអាមេរិកកាលពីថ្ងៃសុក្រ បានរំពឹងថា កិច្ចព្រមព្រៀងអ៊ីរ៉ង់-អូម៉ង់ អាចនឹងជួយបើកផ្លូវទឹកដ៏សំខាន់នេះឡើងវិញក្នុងពេលឆាប់ៗ។ គួររំលឹកថា ច្រកសមុទ្រហ័រមូស ដែលជាផ្លូវផ្គត់ផ្គង់ប្រេង និងឧស្ម័ន ២០ភាគរយនៃពិភពលោក ត្រូវបានអ៊ីរ៉ង់បិទខ្ទប់ស្ទើរតែទាំងស្រុង ដើម្បីសងសឹកការវាយប្រហាររបស់អាមេរិក និងអ៊ីស្រាអែលកាលពីដើមឆ្នាំនេះ៕