(មូស្គូ)៖ ការវាយប្រហារដោយយន្តហោះដ្រូនរបស់អ៊ុយក្រែន នៅតំបន់ Tatarstan ភាគកណ្តាលប្រទេសរុស្ស៉ី បានផ្តាច់ជីវិតមនុស្សយ៉ាងហោច១២នាក់ ក្នុងការវាយប្រហារដ៏ប្រល័យមួយរបស់ទីក្រុងកៀវ ចាប់តាំងពីប្រទេសទាំងពីរ បានផ្ទុះសង្រ្គាមនឹងគ្នាអស់រយៈពេលជាង៤ឆ្នាំមកនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី១០ ខែសីហា ឆ្នាំ២០២៦។

អាជ្ញាធរតំបន់ Tatarstan នៅថ្ងៃចន្ទនេះ បានអះអាងថា យោងតាមព័ត៌មានចុងក្រោយបង្អស់ គឺមានមនុស្សសរុប១២នាក់ បានស្លាប់និង៣៩នាក់បានរងរបួស ដោយសារតែការវាយប្រហារដ្រូនរបស់អ៊ុយក្រែន នៅទីក្រុង Nizhnekamsk។ មានចម្ងាយ​ជាង១០០០គីឡូម៉ែត្រពីព្រំប្រទល់អ៊ុយក្រែន តំបន់ Tatarstan សម្បូរទៅដោយធនធានថាមពល និងជាកន្លែងមានរោងចក្រចម្រាញ់ប្រេងធំៗជាច្រើន ដែលទីក្រុងកៀវបានកំណត់គោលដៅ ក្នុងការវាយប្រហារសងសឹករបស់ខ្លួន។

គួរបញ្ជាក់ថា ភាគីទាំងពីរបានបង្កើនជាខ្លាំង នូវការវាយប្រហាររយៈចម្ងាយឆ្ងាយដាក់គ្នាទៅវិញទៅមក នៅក្នុងឆ្នាំនេះ រហូតនាំឱ្យ​អង្គការសហប្រជាជាតិ រាយការណ៍ពីការកើនឡើងគួរបារម្ភ នៃចំនួនជនស៉ីវិលដែលបានបាត់បង់ជីវិត។ នាថ្ងៃចន្ទនេះ​ អាជ្ញាធរនៅ​អ៊ុយក្រែន បានអះអាងថា កងកម្លាំងរបស់រុស្ស៉ី បានការវាយប្រហារដោយបាញ់ផ្លោងក្នុងទ្រង់ទ្រាយធំមួយ នៅតំបន់ Kharkiv ភាគឦសាន បណ្តាលឱ្យមនុស្ស៥នាក់ស្លាប់។

ក្រសួងការពារជាតិរុស្ស៉ី បានរាយការណ៍ថា កងកម្លាំងរបស់ខ្លួន បានបាញ់ទម្លាក់ដ្រូនអ៊ុយក្រែនសរុប ៤៥៦គ្រឿង កាលពីវេលាយប់កន្លងទៅនេះ ខណៈកងទ័ពអាកាសអ៊ុយក្រែន បានរាយការណ៍ថា រុស្ស៉ីបានបញ្ជូនដ្រូន១២៦គ្រឿង វាយប្រហារមកលើខ្លួន ក្នុងអំឡុងពេលដូចគ្នា៕