(Reuters)៖ បណ្តាប្រទេសជិតខាងរបស់រុស្ស៉ីនៅភាគខាងជើង និងដែលជាសមាជិកអង្គការណាតូ (NATO) កំពុងបង្កើនវិធានការសន្តិសុខ ជុំវិញទំនប់វារីអគ្គិសនី រោងចក្រថាមពល និងហេដ្ឋារចនាសម្ព័ន្ធឧស្ម័នធម្មជាតិ ដោយសារមានការព្រួយបារម្ភកាន់តែខ្លាំងឡើងថា រុស្ស៉ីអាចធ្វើការវាយប្រហារក្នុងទម្រង់ជា «ប្រតិបត្តិការបន្លំភ្នែក» មកលើទីតាំងទាំងនោះ ដោយប្រើដ្រូនរបស់អ៊ុយក្រែន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី១១ ខែសីហា ឆ្នាំ២០២៦។

សប្តាហ៍មុន ប្រទេសលីទុយអានី បានលើកឡើងថា ទីក្រុងមូស្គូកំពុងពិចារណា ធ្វើប្រតិបត្តិការវាយប្រហារក្លែងក្លាយ ខណៈប៉ូឡូញ ឡេតូនី និងអេស្តូនី ក៏បានព្រមានផងដែរ អំពីសកម្មភាពបំផ្លិចបំផ្លាញ ក្នុងគោលបំណងសាកល្បងប្រតិកម្មណាតូ ចំពេលដែលការប្តេជ្ញាចិត្តរបស់សហរដ្ឋអាមេរិក ចំពោះសម្ព័ន្ធភាពយោធាលោកខាងលិចមួយនេះ ស្ថិតក្នុងភាពមិនច្បាស់លាស់។

អ្នកនាំពាក្យវិមានក្រឹមឡាំង លោក Dmitry Peskov ធ្លាប់និយាយថា ការព្រមានអំពីការវាយប្រហារដោយសម្ងាត់របស់រុស្ស៉ី គឺជារឿងរ៉ាវបំភិតបំភ័យ ដែលត្រូវបានប្រើប្រាស់ ដើម្បីផ្តល់ហេតុផលសម្រាប់ការបង្កើនកម្លាំងយោធា ប្រឆាំងនឹងរុស្ស៉ី។ ប៉ូឡូញ និងប្រទេសបាល់ទិកទាំង ៣ ដែលមានព្រំដែនជាប់រុស្ស៉ី​ ហើយបានរកឃើញដ្រូនអ៊ុយក្រែន លើទឹកដីរបស់ខ្លួននោះ កំពុងចាត់វិធានការយ៉ាងប្រុងប្រយ័ត្នខ្ពស់ ដើម្បីកុំឱ្យមានហានិភ័យណាមួយកើតឡើង។

លីទុយអានីបានបញ្ជូនកងទ័ព ឱ្យទៅជួយគាំទ្រដល់ប៉ូលិសបង្ក្រាបកុបកម្ម ដើម្បីការពារស្ថានីយនាំចូលឧស្ម័នធម្មជាតិរាវ (LNG) ស្ថានីយផលិតផលប្រេង បណ្តាញតភ្ជាប់ថាមពលដ៏សំខាន់ជាមួយប៉ូឡូញ និងស្ថានីយវារីអគ្គិសនីប្រភេទបូមទឹកស្តុកទុក នៅតំបន់ Kruonis កាលពីខែមុន។ ចំណែក ឡេតូនីបានបង្កើនសន្តិសុខ នៅជុំវិញទីតាំងហេដ្ឋារចនាសម្ព័ន្ធសំខាន់ៗទាំងអស់ រួមទាំងទំនប់លើទន្លេ Daugava ក្បែរទីក្រុង Riga និងកន្លែងស្តុកឧស្ម័នក្រោមដី Incukalns។

នៅឯប៉ូឡូញ ក្រុមហ៊ុនប្រេង និងឧស្ម័នឈានមុខគេ Orlen កំពុងសិក្សារកផ្លូវផ្សេងដើម្បីនាំចូលឧស្ម័ន ករណីដែលផ្លូវនាំចូលធម្មតាជួបបញ្ហា ឬរងការរំខាន។ Polskie Elektrownie Jadrowe ដែលជាក្រុមហ៊ុនរដ្ឋ ទទួលបន្ទុកអភិវឌ្ឍរោងចក្រថាមពលនុយក្លេអ៊ែរដំបូងគេរបស់ប៉ូឡូញ ក៏បានឱ្យដឹងថា មានការបែកធ្លាយឯកសារក្លែងក្លាយ ក្នុងគោលបំណងបង្កការភាន់ច្រឡំដល់ភាគីពាក់ព័ន្ធ ហើយប្រភពនៃឯកសារទាំងនោះ អាចត្រូវបានតាមដានដល់តំបន់មួយនៅភាគខាងកើតប្រទេស៕