(កៀវ)៖ នៅថ្ងៃអង្គារ ទី១១ ខែសីហា ឆ្នាំ២០២៦ អាជ្ញាធរអ៊ុយក្រែន បាននិយាយថា ការវាយប្រហាររបស់រុស្ស៉ីនៅពាសពេញ​អ៊ុយក្រែន បានផ្តាច់ជីវិតមនុស្សសរុបយ៉ាងហោច៩នាក់ និងបង្កឱ្យរបួសជាច្រើននាក់ផ្សេងទៀត បន្ទាប់ពីទីក្រុងកៀវព្រមានថា ទីក្រុងមូស្គូទទួលបានមីស៉ីលបាលិស្ទីគថ្មីៗបន្ថែមពីកូរ៉េខាងជើង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ការវាយប្រហារកាលពីវេលាយប់កន្លងទៅនេះ កើតមានឡើងលើតំបន់ចាប់ពីរដ្ឋធានីកៀវ ដល់តំបន់ Zaporizhzhia និង Dnipropetrovsk។ លោក Ivan Fedorov ប្រធានរដ្ឋបាលយោធានៃតំបន់ Zaporizhzhia ភាគអាគ្នេយ៍ បានឱ្យដឹងថា ក្រោយមានការវាយប្រហារលើតំបន់នេះ មនុស្ស៦នាក់ត្រូវបានសម្លាប់ និង១៩នាក់បានរងរបួស។ រី​ឯនៅតំបន់ Dnipropetrovsk ភាគខាងកើត ការវាយប្រហារដោយដ្រូននិងការបាញ់ផ្លោងរបស់រុស្ស៉ី បានសម្លាប់មនុស្ស៣នាក់ទៀត ហើយ​បង្កឱ្យរបួស៥នាក់។

ដោយឡែក នៅទីក្រុងកៀវ គេក៏បានលឺសំឡេងផ្ទុះខ្លាំងៗជាបន្តបន្ទាប់ផងដែរ នាវេលាយប់ពាក់កណ្តាលអធ្រាត្រ ឈានចូលថ្ងៃអង្គារនេះ ខណៈអភិបាលរដ្ឋធានីអ៊ុយក្រែន លោក Vitali Klitschko អះអាងថា ទីក្រុងកៀវបានស្ថិតក្រោមការវាយប្រហារដោយមីស៉ីលបាលិស្ទីគ។

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានបន្តអះអាងថា រុស្ស៉ីកំពុងត្រៀមដាក់ពង្រាយកងទ័ពកូរ៉េខាងជើងច្រើន​ថែមទៀត ហើយក៏ទទួលបានមីស៉ីលបាលិស្ទីគថ្មីៗ ពីទីក្រុងព្យុងយ៉ាងផងដែរ។ ប៉ុន្មានសប្តាហ៍មកនេះ ទីក្រុងមូស្គូបានបង្កើនការវាយប្រហារ​ដោយមីស៉ីលបាលិស្ទីគប្រឆាំងអ៊ុយក្រែន ខណៈមីស៉ីលប្រភេទនេះ មានតែប្រព័ន្ធការពារដែនអាកាសមួយចំនួនប៉ុណ្ណោះ ដូចជាប្រព័ន្ធ Patriot ដែលអាចបាញ់ស្ទាក់បាន។

គួរបញ្ជាក់ថា បញ្ហាខ្វះខាតមីស៉ីល PAC-3 របស់ប្រព័ន្ធ Patriot នៅអ៊ុយក្រែន គឺកាន់តែដុនដាបខ្លាំង ចាប់តាំងពីអាមេរិក បានរួមដៃជាមួយអ៉ីស្រាអែល បង្កសង្រ្គាមប្រឆាំងប្រទេសអ៉ីរ៉ង់ កាលពីខែកុម្ភៈ ហើយមកទល់ពេលនេះ មិនទាន់រកទីបញ្ចប់ឃើញ​នៅឡើយ។ ស្របពេលដែលរុស្ស៉ីបង្កើនការវាយប្រហាររបស់ខ្លួន អ៊ុយក្រែនផ្ទាល់ក៏បានបង្កើនការវាយប្រហារដូចគ្នា ប្រឆាំងទីក្រុងនានា​របស់រុស្ស៉ី ដែលស្ថិតនៅឆ្ងាយពីព្រំដែន និងបណ្តាលឱ្យមានមនុស្សស្លាប់ជាបន្តបន្ទាប់៕