(វ៉ាស៉ីនតោន)៖ នាថ្ងៃចន្ទ ទី១០ ខែសីហា ឆ្នាំ២០២៦ ក្រសួងការបរទេសសហរដ្ឋអាមេរិក បានប្រកាសផ្តល់ជំនួយបន្ទាន់ចំនួន ១៥,៥លានដុល្លារ សម្រាប់ប្រទេសកូឡុំប៊ី ក្រោយគ្រោះរញ្ជួយដីធ្ងន់មួយកម្រិត៧,៤រ៉ិចទ័រ បានផ្តាច់ជីវិតមនុស្សយ៉ាងហោច ១១១នាក់ និងបំផ្លិចបំផ្លាញអគាររាប់រយខ្នង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្រសួងការបរទេសអាមេរិក បានប្រកាសដូច្នេះថា ក្រោយគ្រោះរញ្ជួយដីដ៏ខ្លាំងក្លាមួយនាថ្ងៃនេះ នៅប្រទេសកូឡុំប៊ី រដ្ឋបាលលោក ត្រាំ ប្តេជ្ញាផ្តល់ជំនួយបន្ទាន់ ១៥,៥លានដុល្លារ សម្រាប់ផ្តល់កន្លែងជ្រកកោនបណ្តោះអាសន្ន ស្បៀងអាហារ ការការពារ និងកិច្ចប្រឹងប្រែងវាយតម្លៃ​ពីទំហំនៃការខូចខាត តម្រូវការ ក៏ដូចជាហានិភ័យ បង្កឡើងដោយធម្មជាតិនេះ។

ទន្ទឹមគ្នានោះ អ្នកនាំពាក្យក្រសួងការបរទេសអាមេរិក លោក Tommy Pigott បាននិយាយថា​ ក្រសួងកំពុងធ្វើការយ៉ាងសកម្ម ដើម្បីជួយពលរដ្ឋអាមេរិកនានា ដែលរងការប៉ះពាល់ពីរញ្ជួយដីខាងលើ ហើយទទូចឱ្យពលរដ្ឋអាមេរិកនៅកូឡុំប៊ី ទាក់ទងមកកាន់​ស្ថានទូតអាមេរិកនៅទីក្រុងបូហ្គោតា ដើម្បីសុំការជួយដោយផ្ទាល់។

គួរបញ្ជាក់ថា រញ្ជួយដីបានកើនឡើងក្បែរទីក្រុង San Jose del Palmar ក្នុងតំបន់ Choco ស្ថិតនៅចម្ងាយប្រហែល ៤០០គីឡូម៉ែត្រ ពីរដ្ឋធានីបូហ្គោតា ជាមួយជម្រៅជាង១០០គីឡូម៉ែត្រ។ អាជ្ញាធរកូឡុំប៊ី បានឱ្យដឹងថា មនុស្សយ៉ាងហោច ១១១នាក់ បានស្លាប់ និង៨៧នាក់បានរងរបួស ខណៈអគារប្រហែល១៦០០ខ្នងរងការខូចខាត ក្នុងនោះ៦១ខ្នងបានដួលរលំ៕