(ហាណូយ)៖ កាលពីយប់ថ្ងៃចន្ទ ទី១០ ខែសីហា ឆ្នាំ២០២៦ ប្រព័ន្ធផ្សព្វផ្សាយរដ្ឋវៀតណាម បានរាយការណ៍ថា វៀតណាម បានចាប់ផ្តើមការសាងសង់នាវាចម្បាំងប្រឆាំងនាវាមុជទឹក ផលិតនៅក្នុងប្រទេសខ្លួនផ្ទាល់ ដែលមានទំហំធំនិងទំនើបបំផុត។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កាសែតវៀតណាម Quan Doi Nhan Dan បានអះអាងថា ការចាប់ផ្តើមសាងសង់នាវាចម្បាំងនេះ កំពុងប្រព្រឹត្តទៅនៅឯ​មូលដ្ឋានផលិតនាវា Song Thu Shipyard របស់ក្រសួងការពារជាតិវៀតណាម ក្នុងទីក្រុង Danang។ តាមប្រភពដដែល សព្វាវុធនិងបរិក្ខារយោធាភាគច្រើន ដែលបំពាក់លើនាវានេះ ក៏នឹងជារបស់ដែលត្រូវបានអភិវឌ្ឍ ឬដំឡើងនៅក្នុងប្រទេសផ្ទាល់​ផងដែរ។

វៀតណាម ដែលជាយូរមកហើយមានបញ្ហាវិវាទដែនទឹក ជាមួយប្រទេសចិននិងភាគីដទៃទៀត នៅតំបន់សមុទ្រចិនខាងត្បូង បាននិងកំពុងព្យាយាមពង្រីក សមត្ថភាពឧស្សាហកម្មផលិតបរិក្ខារការពារជាតិក្នុងស្រុករបស់ខ្លួន ហើយកាត់បន្ថយការពឹងផ្អែក​លើ​សម្ភារយោធានាំចូល ដែលជាចម្បងមានប្រភពមកពីរុស្ស៉ី។

គួរបញ្ជាក់ថា ប្រមាណជា១ទសវត្សរ៍កន្លងមកនេះ កងទ័ពជើងទឹកវៀតណាម បានឆ្លងកាត់ការធ្វើទំនើបកម្មក្នុងទ្រង់ទ្រាយធំ ជាមួយការទិញនាវាមុជទឹកថ្នាក់ Kilo-class និងនាវាចម្បាំងថ្នាក់ Gepard-class ដែលផលិតដោយរុស្ស៉ី ព្រមទាំងការកើនឡើងជាលំដាប់ ​នៃចំនួនទូកបំពាក់មីស៉ីល​និងនាវាល្បាត ដែលផលិតនៅក្នុងស្រុក។ នៅខែធ្នូ ចុងឆ្នាំ២០២៦នេះ វៀតណាម នឹងត្រូវរៀបចំពិព័រណ៍ការពារជាតិធំមួយហៅថា Vietnam International Defence Expo នៅទីក្រុងហាណូយ ស្របពេល​ដែលខ្លួនខិតខំជំរុញសមត្ថភាពផលិតសម្ការការពារជាតិក្នុងស្រុក ហើយធ្វើពិពិធកម្មប្រភពនៃការនាំចូលបរិក្ខារយោធា៕