(ប៉េកាំង)៖ នាថ្ងៃអង្គារ ទី១១ ខែសីហា ឆ្នាំ២០២៦ ចិនបានព្រមានអគ្គលេខាធិការវេទិកាកោះប៉ាស៉ីហ្វិក (Pacific Islands Forum) ចៀសវាងធ្វើឱ្យប៉ះពាល់ដល់ការអភិវឌ្ឍទំនាក់ទំនង ដែលល្អនិងមានស្ថិរភាព បន្ទាប់ពីអគ្គលេខាធិការរូបនោះ បាននិយាយថា តៃវ៉ាន់នឹងចូលរួមកិច្ចប្រជុំប្រចាំឆ្នាំរបស់មេដឹកនាំនៃក្រុមប្រទេសជាសមាជិកវេទិកានេះ។ នេះបើតាមការចេញផ្សាយ​ដោយទីភ្នាក់ងារព័ត៌មាន AFP។

កោះតៃវ៉ាន់ត្រូវបានហាមឃាត់មិនឱ្យចូលរួមកិច្ចប្រជុំមេដឹកនាំក្រុមប្រទេសវេទិកា Pacific Islands Forum កាលពីឆ្នាំ២០២៥ ក្រោយមានការជំទាស់ជាខ្លាំងពីសំណាក់ទីក្រុងប៉េកាំង ដែលចាត់ទុកតៃវ៉ាន់ជាផ្នែកនៃទឹកដីរបស់ប្រទេសចិន។ ប៉ុន្តែកាលពីថ្ងៃសុក្រសប្តាហ៍មុន អគ្គលេខាធិការវេទិកា Pacific Islands Forum គឺលោក Baron Waqa បានប្រាប់ក្រុមអ្នកសារព័ត៌មានថា ទីក្រុងតៃប៉ិនឹងចូលរួមកិច្ចប្រជុំឆ្នាំនេះ។

នៅថ្ងៃអង្គារនេះ​ ក្រសួងការបរទេសចិន បានលើកឡើងថា ចិនទទូចឱ្យអគ្គលេខាធិការនៃវេទិកា Pacific Islands Forum គោរពឱ្យម៉ឺងម៉ាត់ចំពោះគោលការណ៍ចិនតែមួយ និងចាត់ចែងឱ្យត្រឹមត្រូវបញ្ហាពាក់ព័ន្ធជាមួយតៃវ៉ាន់ ហើយចៀសវាងបង្កការប៉ះពាល់​ចំពោះការអភិវឌ្ឍទំនាក់ទំនង ដែលល្អនិងមានស្ថិរភាព រវាងចិននិងវេទិកានេះ។

គួរបញ្ជាក់ថា សមាជិកវេទិកា Pacific Islands Forum ដូចជាណូរូ គិរីបាទី និងសូឡូម៉ុន បាននាំគ្នាផ្តាច់ទំនាក់ទំនងការទូតជាមួយទីក្រុងតៃប៉ិ ចាប់តាំងពីឆ្នាំ២០១៩។ សូឡូម៉ុន បានរារាំងការចូលរួមរបស់តៃវ៉ាន់ នៅពេលខ្លួនធ្វើជាម្ចាស់ផ្ទះកិច្ចប្រជុំវេទិកានេះ កាលពី​ឆ្នាំ២០២៥។ យ៉ាងណាមិញ ប្រទេស Palua ដែលជាម្ចាស់ផ្ទះកិច្ចប្រជុំឆ្នាំនេះ ដែលនឹងប្រព្រឹត្តទៅចាប់ពីថ្ងៃទី៣០ ខែសីហា ដល់ថ្ងៃទី៤ ខែកញ្ញា គឺស្ថិតក្នុងចំណោមដៃគូការទូត ដែលនៅសល់តែចំនួន១២ប៉ុណ្ណោះរបស់តៃវ៉ាន់។ រួមជាមួយ Palau សមាជិកមួយចំនួនទៀតនៃវេទិកា Pacific Islands Forum ដូចជាទូវ៉ាលូ និង Marshall Islands ក៏នៅជាសម្ព័ន្ធមិត្តការទូត​របស់ទីក្រុងតៃប៉ិផងដែរ៕