(យេម៉ែន)៖ អាជ្ញាធរឆ្មាំសមុទ្រយេម៉ែន បានឱ្យដឹងថា នាវាដឹកទំនិញធុនតូចមួយគ្រឿងបានរងការវាយប្រហារពីក្រុមឧទ្ទាមហ៊ូទី នៅច្រកសមុទ្រ Bab el-Mandeb កាលពីថ្ងៃអង្គារ ដែលបណ្តាលឱ្យនាវិក ៣នាក់ បានបាត់បង់ជីវិត ដោយក្នុងនោះមានជនជាតិប៉ាគីស្ថាន ២នាក់ និងឥណ្ឌូណេស៊ីម្នាក់​។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នេះគឺជាករណីស្លាប់លើកដំបូងបង្អស់ក្នុងការវាយប្រហាររបស់ក្រុមហ៊ូទីលើនាវាពាណិជ្ជកម្ម ចាប់តាំងពីជម្លោះមជ្ឈិមបូព៌ាបានផ្ទុះឡើងនៅចុងខែកុម្ភៈ។ នាវាដោតទង់ជាតិតង់ហ្សានី (Tanzania) ឈ្មោះ Tihamah ត្រូវបានវាយប្រហារខណៈពេលកំពុងបោះយុថ្កាក្បែរកោះ Perim របស់យេម៉ែន បន្ទាប់ពីធ្វើដំណើរចេញពីអូម៉ង់ឆ្លងកាត់ជីប៊ូទី (Djibouti)។

ទោះបីជាក្រុមហ៊ូទីទើបតែប្រកាសបិទសមុទ្រក្រហមប្រឆាំងនឹងអារ៉ាប៊ីសាអូឌីត កាលពីខែមុនក្តី ប៉ុន្តែក្រុមហ៊ុនសន្តិសុខដែនសមុទ្រអង់គ្លេស Ambrey បញ្ជាក់ថា នាវានេះមិនមែនជារបស់អារ៉ាប៊ីសាអូឌីតនោះទេ។ មកទល់ពេលនេះ ក្រុមហ៊ូទីក៏មិនទាន់ចេញមុខទទួលខុសត្រូវនៅឡើយទេ។

គួររំលឹកថា ការកើនឡើងនៃការវាយប្រហាររបស់ក្រុមហ៊ូទីនៅសមុទ្រក្រហម កំពុងគំរាមកំហែងយ៉ាងធ្ងន់ធ្ងរដល់ខ្សែចង្វាក់ដឹកជញ្ជូនសកល ខណៈដែលច្រកសមុទ្រហ័រមូស កំពុងត្រូវបានបិទខ្ទប់ស្រាប់ទៅហើយ។ បច្ចុប្បន្ន ការធ្វើនាវាចរណ៍ឆ្លងកាត់ច្រក Bab el-Mandeb បានធ្លាក់ចុះពី ៥០គ្រឿង មកនៅត្រឹម ៣២គ្រឿងក្នុងមួយថ្ងៃប៉ុណ្ណោះ៕