(មូស្កាត់)៖ រដ្ឋាភិបាលអូម៉ង់ បានប្រកាសនៅថ្ងៃចន្ទថា ការលេចធ្លាយប្រេងឆៅពីនាវាដែលកំពុងជាប់គាំងនៅក្បែរតំបន់អភិរក្សធម្មជាតិកោះ Hallaniyat បានបង្កើតជាស្នាមប្រេងដ៏ធំគ្របដណ្តប់លើផ្ទៃសមុទ្រប្រមាណ ៣៩០គីឡូម៉ែត្រការ៉េ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នាវា Caroline Bezengi ដែលដឹកប្រេងរុស្ស៊ីជិត ១លានធុង បានរាយការណ៍ពីបញ្ហាតាំងពីដើមខែមិថុនា ដោយប្រភពសន្តិសុខសង្ស័យថាមានការផ្ទុះនៅលើនាវា។ អាជ្ញាធរបរិស្ថានអូម៉ង់អះអាងថា ស្នាមប្រេងនេះស្ថិតនៅចម្ងាយ ៧គីឡូម៉ែត្រពីឆ្នេរ ហើយមិនទាន់គំរាមកំហែងដល់រោងចក្រទឹកស្អាត ឬតំបន់ទេសចរណ៍នៅឡើយទេ។ ទោះជាយ៉ាងណា អង្គការ Greenpeace បានប៉ាន់ស្មានថា ស្នាមប្រេងនេះមានទំហំធំដល់ទៅ ៦០០គីឡូម៉ែត្រការ៉េ។

អ្នកជំនាញបរិស្ថានបានព្រមានថា ប្រសិនបើមិនប្រញាប់ប្រើប្រាស់យន្តហោះបាញ់ថ្នាំរំលាយ និងឧបករណ៍ប្រមូលប្រេងជាបន្ទាន់ទេនោះ វានឹងបង្កមហន្តរាយយ៉ាងធ្ងន់ធ្ងរដល់ជីវិតសត្វសមុទ្រ ដូចជាផ្កាថ្ម និងត្រីបាឡែនជាដើម។ អង្គការឃ្លាំមើលផ្កាយរណប SkyTruth ក៏បានសម្តែងក្តីបារម្ភយ៉ាងខ្លាំងផងដែរ ដោយសារមិនទាន់ឃើញមានប្រតិបត្តិការជួយសង្គ្រោះនាវា ឬការបូមប្រេងចេញ ទោះបីជាហេតុការណ៍នេះអូសបន្លាយជាង ២ខែមកហើយក្តី។

គួររំលឹកថា នាវានេះគឺជាផ្នែកមួយនៃ «កងនាវាសម្ងាត់» របស់រុស្ស៊ី ដែលប្តូរទង់ជាតិ និងគ្មានធានារ៉ាប់រងត្រឹមត្រូវ ដើម្បីគេចពីទណ្ឌកម្មរបស់លោកខាងលិច ខណៈដែលម្ចាស់នាវាដែលត្រូវបានគេជឿថាមានមូលដ្ឋាននៅប្រទេសចិន មិនអាចទាក់ទងសុំការបំភ្លឺបានឡើយ៕