(កាប៊ុល)៖ UNESCO ដែលជាអង្គការអប់រំ វិទ្យាសាស្ត្រ និងវប្បធម៌នៃអង្គការសហប្រជាជាតិ បានឱ្យដឹងថា ក្រុមតាលីបង់បានហាមឃាត់ក្មេងស្រីអាហ្វហ្គានីស្ថាន ប្រមាណ ២,៤លាននាក់ ពីការទទួលបានការអប់រំកម្រិតមធ្យមសិក្សា ចាប់តាំងពីចូលមកគ្រប់គ្រងអាហ្វហ្គានីស្ថានវិញ នៅឆ្នាំ២០២១។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី១២ ខែសីហា ឆ្នាំ២០២៦។

តាមសេចក្តីថ្លែងការណ៍របស់ UNESCO អាហ្វហ្គានីស្ថានគឺជាប្រទេសតែមួយគត់ ដែលក្មេងស្រី និងស្ត្រី ត្រូវបានហាមឃាត់ជាផ្លូវការ មិនឱ្យទទួលបានការអប់រំកម្រិតមធ្យមសិក្សា និងឧត្តមសិក្សា។ UNESCO បញ្ជាក់ថា «សកម្មភាពនេះអាចធ្វើឱ្យអាហ្វហ្គានីស្ថាន បាត់បង់សក្តានុពលរយៈពេលច្រើនទសវត្សរ៍ ជួបប្រទះភាពក្រីក្រកាន់តែធ្ងន់ធ្ងរ និងរងការខូចខាតដែលមិនអាចកែប្រែឡើងវិញបាន»។

UNESCO ព្យាករណ៍ថាការហាមឃាត់បែបនេះ អាចបណ្តាលឱ្យស្ត្រីអាហ្វហ្គានីស្ថានចំនួន ៦០០ ០០០នាក់ ប្រាសចាកពីទីផ្សារការងារត្រឹមឆ្នាំ២០៦៦ ដែលនាំការខាតបង់ប្រាក់ចំណូលសរុបចំនួន ៩,៦ពាន់លានដុល្លារ និងបង្កើនហានិភ័យនៃការរៀបអាពាហ៍ពិពាហ៍នៅវ័យក្មេង។ ក្រសួងអប់រំអាហ្វហ្កានីស្ថាន ដែលគ្រប់គ្រងដោយក្រុមតាលីបង់ មិនទាន់ឆ្លើយតបចំពោះសំណើសុំការអត្ថាធិប្បាយនៅឡើយទេ។

គួរបញ្ជាក់ថា ពេលដែលក្រុមតាលីបង់ ចូលមកគ្រប់គ្រងអាហ្វហ្កានីស្ថានវិញនៅឆ្នាំ២០២១ អំឡុងការដកកងទ័ពរបស់សហរដ្ឋអាមេរិក និងសម្ព័ន្ធមិត្ត ពួកគេបានផ្តល់ការធានាជាច្រើនដង ដល់សហគមន៍អន្តរជាតិថា ស្ត្រីនឹងនៅតែមានសេរីភាព ក្នុងការទៅសាលារៀន និងសិក្សា។ យ៉ាងនេះក្តី សាលាមធ្យមសិក្សាសម្រាប់ក្មេងស្រី បានបិទទ្វារនៅខែមីនា ឆ្នាំ២០២២ ហើយនៅខែធ្នូ ឆ្នាំដដែល ក៏មានការហាមឃាត់ស្ត្រី មិនឱ្យសិក្សានៅសាកលវិទ្យាល័យ។

ក្រុមតាលីបង់ ថាការហាមឃាត់គ្រាន់តែជាវិធានការបណ្តោះអាសន្នប៉ុណ្ណោះ ប៉ុន្តែមកដល់ពេលនេះការអនុវត្តនៅតែបន្តដដែល។ ការរឹតបន្តឹងរបស់ក្រុមតាលីបង់ ក៏កំណត់ផងដែរនូវសកម្មភាពការងារ និងការធ្វើដំណើររបស់ស្ត្រី។ តាលីបង់អះអាងថា ពួកគេគោរពសិទ្ធិស្ត្រីស្របតាមការបកស្រាយរបស់ច្បាប់ឥស្លាម និងវប្បធម៌អាហ្វហ្គានីស្ថាន៕