(គីនស្ហាសា)៖ មន្ត្រីនៅសាធារណរដ្ឋប្រជាធិបតេយ្យកុងហ្គោ (DRC) បានឲ្យដឹងកាលពីថ្ងៃអង្គារ ទី១១ ខែសីហា ឆ្នាំ២០២៦ថា ការឆ្លងរាលដាលជំងឺអេបូឡា នៅក្នុងប្រទេសអាហ្វ្រិកមួយនេះ បានបន្តសម្លាប់មនុស្សកើនដល់ ២០១១ នាក់ ក្នុងចំណោមករណីឆ្លងសរុបចំនួន ៤៣៨១ករណី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

តួលេខអ្នកស្លាប់ថ្មីចុងក្រោយនេះ ធ្វើឲ្យវាស្ថិតនៅពីក្រោយការផ្ទុះឡើងនៃជំងឺអេបូឡាដ៏សាហាវបំផុតរបស់ DRC កាលពីចន្លោះឆ្នាំ២០១៨ ដល់ឆ្នាំ២០២០ ដែលមនុស្សជិត ២៣០០នាក់បានស្លាប់ ក្នុងចំណោមករណីឆ្លងដែលបានកត់ត្រាចំនួន ៣៥០០ករណី។ ការផ្ទុះឡើងនៃជំងឺអេបូឡាលើកនេះ បានវាយប្រហារតំបន់ភាគខាងកើត និងភាគឦសានកុងហ្គោ ដែលញាំញីដោយជម្លោះ ហើយត្រូវបានប្រកាសជាផ្លូវការកាលពីថ្ងៃទី១៥ ខែឧសភា ប៉ុន្តែគេជឿថា វាបានឆ្លងរាលដាលអស់ជាច្រើនសប្តាហ៍ មុននោះទៅទៀត។

កាលពីថ្ងៃសុក្រសប្តាហ៍កន្លងទៅ ក្រុមអ្នកជំនាញវ៉ាក់សាំងរបស់អង្គការសុខភាពពិភពលោក (WHO) បានណែនាំឲ្យធ្វើការសាកល្បងពេញលេញលើមនុស្ស សម្រាប់វ៉ាក់សាំងអេបូឡា ដែលមានការទទួលស្គាល់ឱ្យប្រើប្រាស់ផ្លូវការតែមួយគត់ ដើម្បីកំណត់មើលថា តើវាផ្តល់ការការពារបានដែរឬទេ ប្រឆាំងនឹងអម្បូរវីរុសអេបូឡា ដែលកំពុងរីករាលដាលនៅក្នុងប្រទេសកុងហ្គោ ហើយបច្ចុប្បន្នមិនទាន់មានវ៉ាក់សាំងជាក់លាក់ណាមួយសម្រាប់ប្រយុទ្ធប្រឆាំង។

វ៉ាក់សាំង Ervebo ត្រូវបានបង្ហាញថា មានសុវត្ថិភាព និងប្រសិទ្ធភាពប្រឆាំងនឹងវីរុសអេបូឡាប្រភេទ Zaire ដែលសម្បូរជាងគេ ហើយអ្នកជំនាញ WHO ក៏បាននិយាយដែរថា ទិន្នន័យបឋមជាពិសេសពីការសាកល្បងទៅលើសត្វ បានបង្ហាញថា វាអាចផ្តល់ការការពារខ្លះប្រឆាំងនឹងវីរុសអេបូឡាប្រភេទកម្រ Bundibugyo ដែលកំពុងផ្ទុះរាលដាលនៅក្នុង DRC។

គួរបញ្ជាក់ថា បេក្ខភាពវ៉ាក់សាំង Bundibugyo ឈានមុខចំនួន២ កំពុងស្ថិតក្នុងដំណាក់កាលដំបូង នៃការសាកល្បងលើមនុស្ស ខណៈវ៉ាក់សាំងទីបីកំពុងស្ថិតក្រោមការធ្វើការ ដើម្បីឱ្យឈានដល់ដំណាក់កាលនោះដែរ៕