(វ៉ាស៉ីនតោន)៖ សហរដ្ឋអាមេរិក និងប្រទេសប្រមាណ៤០ផ្សេងទៀត កាលពីថ្ងៃអង្គារ ទី១១ ខែសីហា ឆ្នាំ២០២៦ បានព្រមានពីគ្រោះថ្នាក់នៃការធ្វើតេស្តមីស៊ីលផ្លោងបាលិស្ទីគ ដោយគ្មានការជូនដំណឹងជាមុន នៅក្នុងសេចក្តីថ្លែងការណ៍រួមមួយ ដែលធ្វើឡើងមួយខែបន្ទាប់ពីប្រទេសចិន បានបាញ់សាកល្បងមីស៊ីលអាចបំពាក់នុយក្លេអ៊ែរ ចូលទៅក្នុងមហាសមុទ្រប៉ាស៊ីហ្វិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សេចក្តីថ្លែងការណ៍រួម ដែលចេញដោយបណ្តាប្រទេសមកពីទ្វីបអឺរ៉ុប និងតំបន់ឥណ្ឌូ-ប៉ាស៊ីហ្វិក បានលើកឡើងដូច្នេះថា «ការធ្វើតេស្តមីស៊ីលបាលិស្ទីគ ដែលមានសមត្ថភាពបំពាក់នុយក្លេអ៊ែរ ដោយគ្មានការជូនដំណឹងជាមុនគ្រប់គ្រាន់ និងលម្អិត គឺគ្រោះថ្នាក់និងរំខានចំពោះសន្តិភាពនិងសន្តិសុខរបស់បណ្តាប្រទេសពាក់ព័ន្ធ ដែលនៅក្បែរការធ្វើតេស្តទាំងនេះ»។ ក្រុមប្រទេសខាងលើ បានបន្តថា «វាបង្កើនហានិភ័យនៃការគណនាខុស ប៉ះពាល់ដល់ស្ថិរភាពនិងសន្តិសុខសកល ហើយមិនស្របជាមួយការទទួលខុសត្រូវ ក្នុងនាមជាប្រទេសដែលកាន់កាប់មីស៊ីលរយៈចម្ងាយឆ្ងាយឡើយ»។

សេចក្តីថ្លែងការណ៍ដដែល បានអំពាវនាវឱ្យប្រទេសទាំងអស់ ផ្តល់ការជូនដំណឹងយ៉ាងហោច ២៤ម៉ោង មុនការបាញ់តេស្ត ដែលរួមបញ្ចូលនូវព័ត៌មានប្រភេទមីស៊ីលដែលត្រូវបាញ់ ក៏ដូចជាពេលវេលា ទីកន្លែង និងទិសដៅដែលបានគ្រោងទុក។ សេចក្តីថ្លែងការណ៍បានបន្ថែមទៀតថា «ប្រទេសនានា ក៏គួរតែផ្តល់ការជូនដំណឹងច្បាស់លាស់ផងដែរ សម្រាប់អាកាសយានិក និងនាវិកស្របតាមស្តង់ដារអន្តរជាតិ ដើម្បីកាត់បន្ថយហានិភ័យ»។

គួរបញ្ជាក់ថា ទីក្រុងប៉េកាំង បានផ្តល់ការជូនដំណឹងខ្លីប៉ុណ្ណោះ ដល់ប្រទេសមួយចំនួនតូច មុនពេលធ្វើតេស្តបាញ់មីស៊ីលបាលិស្ទីគអន្តរទ្វីប កាលពីខែកក្កដា ដែលត្រូវបានមើលឃើញថា ជាការដំឡើងសាច់ដុំកម្លាំងយោធា នៅក្នុងតំបន់មួយដែលខ្លួនបានស្វែងរកការពង្រីកឥទ្ធិពល ជាយូរមកហើយ។ មីស៉ីលនោះហាក់បានធ្លាក់ចូលទៅក្នុងកន្លែងមួយនៃមហាសមុទ្រ ដែលស្ថិតនៅចន្លោះប្រទេសដែនកោះសូឡូម៉ូន ណូរូ និងទូវ៉ាលូ៕