(ការ៉ាកាស)៖ កាលពីថ្ងៃអង្គារ ទី១១ ខែសីហា ឆ្នាំ២០២៦ រដ្ឋាភិបាលវ៉េណេស៊ុយអេឡា និងរដ្ឋាភិបាលអ៉ីស្រាអែល បានប្រកាសពីការព្រមព្រៀងបើកសេវាកុងស៊ុល នៅក្នុងប្រទេសរៀងៗខ្លួនឡើងវិញ ដែលជាការផ្លាស់ប្តូរដ៏សំខាន់មួយ នៅក្នុងគោលជំហរភូមិសាស្ត្រនយោបាយរបស់ប្រទេសអាមេរិកខាងត្បូងមួយនេះ បន្ទាប់ពីកាត់ផ្តាច់ទំនាក់ទំនងជាមួយអ៉ីស្រាអែល នាឆ្នាំ២០០៩។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

វ៉េណេស៊ុយអេឡា ដែលបានកាត់ផ្តាច់ទំនាក់ទំនងកាលពី ១៧ឆ្នាំមុន ជុំវិញការវាយប្រហាររបស់អ៉ីស្រាអែលនៅតំបន់ហ្កាហ្សា បានពង្រឹងទំនាក់ទំនងជាមួយទីក្រុងវ៉ាស៉ីនតោន ដែលជាសម្ព័ន្ធមិត្តអ៉ីស្រាអែល តាំងពីសហរដ្ឋអាមេរិកចូលទៅចាប់ខ្លួនប្រធានាធិបតី នីកូឡាស ម៉ាឌូរ៉ូ ដែលជំរុញឱ្យប្រទេសនេះ ឃ្លាតឆ្ងាយពីសម្ព័ន្ធភាពជាប្រវត្តិសាស្ត្ររបស់ខ្លួនជាមួយអ៉ីរ៉ង់។

រដ្ឋាភិបាលវ៉េណេស៊ុយអេឡា ដែលបច្ចុប្បន្នដឹកនាំដោយប្រធានាធិបតីស្តីទី លោកស្រី Delcy Rodriguez បានឱ្យដឹងថា គណៈប្រតិភូផ្នែកមនុស្សធម៌របស់អ៉ីស្រាអែល បានមកបំពេញទស្សនកិច្ចនៅវ៉េណេស៊ុយអេឡា បន្ទាប់ពីគ្រោះរញ្ជួយដីដ៏សាហាវកាលពីខែមិថុនា ហើយការពិភាក្សារវាងមន្ត្រីជាន់ខ្ពស់នៃប្រទេសទាំងពីរ នាំឱ្យមានកិច្ចព្រមព្រៀងមួយ ដើម្បីចាប់ផ្តើមដំណើរការសេវាកុងស៊ុលឡើងវិញ។

តាមសេចក្តីថ្លែងការណ៍របស់រដ្ឋាភិបាលវ៉េណេស៊ុយអេឡា ដែលចេញផ្សាយដោយក្រសួងការបរទេសអ៉ីស្រាអែលផងនោះ រដ្ឋាភិបាលទាំងពីរ ទទួលស្គាល់ពីសារៈសំខាន់នៃទំនាក់ទំនងរវាងរដ្ឋអ៉ីស្រាអែល និងសហគមន៍ជនជាតិជ្វីហ្វ នៅក្នុងប្រទេសវ៉េណេស៊ុយអេឡា ដែលជាស្ពានមិត្តភាពជាប្រវត្តិសាស្ត្រដ៏សំខាន់មួយនៃប្រទេសទាំងពីរ៕