(ហ្សាកាតា)៖ កងទ័ពជើងទឹកឥណ្ឌូណេស៊ី បានបញ្ជាក់នៅថ្ងៃពុធថា ផែនការធ្វើសមយុទ្ធយោធារួមគ្នាដែលចិនអះអាងថានឹងធ្វើឡើងនៅភាគខាងកើតកោះតៃវ៉ាន់នោះ គឺជារឿងធម្មតា និងមិនពាក់ព័ន្ធនឹងការហ្វឹកហាត់ធ្វើសង្គ្រាមនោះទេ បន្ទាប់ពីទីក្រុងតៃប៉ិបានសម្តែងក្តីព្រួយបារម្ភយ៉ាងខ្លាំង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កាលពីថ្ងៃអង្គារ ក្រសួងការពារជាតិចិនប្រកាសថា ខ្លួននឹងធ្វើសមយុទ្ធ «នាវាចរណ៍រួមគ្នា» ជាមួយនាវាចម្បាំងឥណ្ឌូណេស៊ីនៅពាក់កណ្តាលខែសីហា។ ទោះជាយ៉ាងណា អ្នកនាំពាក្យកងទ័ពជើងទឹកឥណ្ឌូណេស៊ី បានពន្យល់ថា នាវារបស់ខ្លួនគ្រាន់តែធ្វើ «សមយុទ្ធឆ្លងកាត់» (Passex) ដែលជាប្រពៃណីរបស់កងទ័ពជើងទឹកសកល ក្នុងពេលកំពុងធ្វើដំណើរត្រឡប់មកពីរុស្ស៊ីវិញប៉ុណ្ណោះ។

ជាការឆ្លើយតប ក្រុមប្រឹក្សាកិច្ចការដីគោករបស់តៃវ៉ាន់ បានចាត់ទុកសកម្មភាពនេះថាជា «ការញុះញង់យោធា» និងបានចោទប្រកាន់ទីក្រុងប៉េកាំង ថាកំពុងប្រើលេសសមយុទ្ធ ដើម្បីបំភ័ន្តភ្នែកអន្តរជាតិឱ្យជឿថា ចិនមានអំណាចគ្រប់គ្រងលើដែនទឹកភាគខាងកើតកោះតៃវ៉ាន់។​ មន្ត្រីសន្តិសុខជាន់ខ្ពស់តៃវ៉ាន់ ក៏បានអះអាងដែរថា ចិនកំពុងព្យាយាមបំប៉ោងសកម្មភាពជួបគ្នាតាមផ្លូវធម្មតា ឱ្យទៅជាប្រតិបត្តិការយោធាដ៏ធំដុំ៕