(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានបញ្ជាក់នៅថ្ងៃពុធថា លោកពិតជាបានប្តូរយន្តហោះជាសម្ងាត់នៅក្នុងប្រទេសតួកគីយ៉េកាលពីខែមុនមែន ប៉ុន្តែលោកអះអាងថាយន្តហោះយោធាដែលលោកជិះនោះ បែរជាប្រឈមហានិភ័យខ្ពស់ជាងយន្តហោះប្រធានាធិបតី Air Force One ទៅទៀត។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

សារព័ត៌មានអាមេរិកបានរាយការណ៍ថា ក្រោយបញ្ចប់កិច្ចប្រជុំកំពូលណាតូនៅទីក្រុងអង់ការ៉ា លោក ត្រាំ ត្រូវបានកងការពារ (US Secret Service) លួចជម្លៀសចេញពីយន្តហោះ Air Force One តាមរយៈរថយន្តដឹកម្ហូបអាហារ ទៅកាន់យន្តហោះយោធាមួយផ្សេងទៀត ដោយសារមានការគំរាមកំហែងធ្វើឃាតពីអ៊ីរ៉ង់។ ការលាក់បាំងនេះ ធ្វើឱ្យក្រុមអ្នកសារព័ត៌មាន និងបុគ្គលិកសេតវិមានដែលធ្វើដំណើរលើយន្តហោះ Air Force One ព្រួយបារម្ភយ៉ាងខ្លាំងពីសុវត្ថិភាពរបស់ពួកគេ។

ជាការឆ្លើយតប លោក ត្រាំ បានប្រាប់អ្នកសារព័ត៌មានថា៖ «ខ្ញុំគិតថាយន្តហោះដែលខ្ញុំជិះនោះទេ ដែលប្រឈមនឹងហានិភ័យខ្ពស់ជាង ព្រោះពួកគេ (អ្នកវាយប្រហារ) ទំនងជាចង់តាមកម្ទេចយន្តហោះដែលខ្ញុំជិះ»។ លោកបានបន្ថែមថា លោកគ្រាន់តែធ្វើតាមការចាត់ចែងរបស់ទីភ្នាក់ងារសម្ងាត់ និងយោធាប៉ុណ្ណោះ ទោះបីជាមានការលេងសើចតាមបណ្តាញសង្គមជុំវិញការលាក់ខ្លួនក្នុងឡានម្ហូបក្តី។

គួររំលឹកថា ក្នុងដំណើរទស្សនកិច្ចនោះ លោក ត្រាំ បានជិះយន្តហោះប្រធានាធិបតីថ្មីដែលជាអំណោយពីប្រទេសកាតាទៅកាន់តួកគីយ៉េ ប៉ុន្តែស្រាប់តែសម្រេចចិត្តប្តូរមកជិះយន្តហោះ Air Force One ស៊េរីចាស់វិញពេលធ្វើដំណើរត្រឡប់ ដែលបង្កឱ្យមានចម្ងល់ជាច្រើនជុំវិញសុវត្ថិភាពនៃយន្តហោះថ្មីនោះ ចំពេលដែលមានការកើនឡើងភាពតានតឹងជាមួយអ៊ីរ៉ង់៕