(កៀវ)៖ ប្រធានាធិបតីអ៊ុយក្រែន​ លោក វ៉ូឡូឌីមៀ ហ្សេលេនស្គី បាននិយាយនៅក្នុងបទសម្ភាសន៍មួយដែលត្រូវបានចេញផ្សាយនៅថ្ងៃព្រហស្បតិ៍ ទី១៣ ខែសីហា ឆ្នាំ២០២៦ ថាប្រទេសរបស់លោកត្រូវការ ៥ភាគរយនៃគ្រាប់មីស៊ីលសម្រាប់ប្រព័ន្ធខែលប្រឆាំងមីស៊ីលអាមេរិក Patriot ដើម្បីការពារខ្លួនអំឡុងរដូវរងាខាងមុខ និង១០ភាគរយដើម្បីបាញ់ទម្លាក់គ្រាប់មីស៊ីលបាលិស្ទីគទាំងអស់របស់រុស្ស៉ី។ នេះបើតាមការចេញផ្សាយដោយទីភ្នាក់ងារសារព័ត៌មាន​ AFP។

រុស្ស៉ីបច្ចុប្បន្នបានបង្កើនការបាញ់មីស៊ីលបាលិស្ទីគលើរដ្ឋធានីកៀវរបស់អ៊ុយក្រែន ក្នុងពេលដែលអ៊ុយក្រែនកំពុងខ្វះខាតគ្រាប់មីស៊ីលសម្រាប់ប្រព័ន្ធការពារដែនអាកាស។ ជាក់ស្ដែង នៅក្នុងការវាយប្រហារមួយដោយមីស៊ីលបាលិស្ទីគរបស់រុស្ស៉ី អ៊ុយក្រែនមិនអាចបាញ់ស្ទាក់មីស៊ីលបាលិស្ទីគរបស់រុស្ស៉ីបានសូម្បីតែមួយគ្រាប់ ក្នុងចំណោម ២៨គ្រាប់។ នៅក្នុងបទសម្ភាសន៍ជាមួយទូរទស្សន៍អាមេរិក CNN លោក ហ្សេលេនស្គី បានឱ្យដឹងថាអ៊ុយក្រែនក្នុងឆ្នាំ២០២៦នេះ មិនមានគ្រាប់មីស៊ីលគ្រប់គ្រាន់សម្រាប់ប្រព័ន្ធការពារដែនអាកាស ដើម្បីទប់ទល់នឹងការវាយប្រហារពីរុស្ស៉ីនោះទេ។ ចំណែក រុស្ស៉ីវិញបែរជាមានគ្រាប់មីស៊ីលបាលិស្ទីគច្រើនជាងមុន។

ដូច្នេះបើតាមលោក ហ្សេលេនស្គី ប្រសិនបើសហរដ្ឋអាមេរិកយល់ព្រមលក់ ៥ភាគរយនៃស្ដុកគ្រាប់មីស៊ីល Patriot នោះអ៊ុយក្រែននឹងមានសមត្ថភាពគ្រប់គ្រាន់ដើម្បីការពារខ្លួន និងអាយុជីវិតប្រជាជន អំឡុងរដូវរងាខាងមុខ។ លោកបន្ថែមថាប្រសិនបើសហរដ្ឋអាមេរិកព្រមលក់ ១០ភាគរយនៃស្ដុកគ្រាប់មីស៊ីល Patriot អ៊ុយក្រែននឹងមានសមត្ថភាពបាញ់កម្ទេចគ្រាប់មីស៊ីលបាលិស្ទីគទាំងអស់របស់រុស្ស៉ី។

គួរបញ្ជាក់ថា អ៊ុយក្រែនកំពុងប្រឈមមុខនឹងការខ្វះខាតធ្ងន់ធ្ងរនូវគ្រាប់មីស៊ីលសម្រាប់ប្រព័ន្ធខែលប្រឆាំងមីស៊ីល Patriot ចាប់តាំងពីសហរដ្ឋអាមេរិក និងអ៉ីស្រាអែលបើកធ្វើសង្រ្គាម ជាមួយអ៉ីរ៉ង់កាលពីចុងខែកុម្ភៈកន្លងទៅ។ មីស៊ីលបាលិស្ទីគគឺពិបាកបាញ់ទម្លាក់ ជាងមីស៊ីលគ្រូស ឬដ្រូន ក៏ព្រោះតែវាអាចហោះក្នុងល្បឿនយ៉ាងលឿន ឬអាចឈានដល់ល្បឿនលឿនជាងសំឡេង៕