(តៃប៉ិ)៖ កងកម្លាំងប្រដាប់អាវុធរបស់កោះតៃវ៉ាន់ បានដឹកនាំការធ្វើសមយុទ្ធប្រឆាំងនឹងការបិទខ្ទប់មួយ អំឡុងការធ្វើសមយុទ្ធយោធាទ្រង់ទ្រាយធំប្រចាំឆ្នាំ ដោយប្រើប្រាស់កងទ័ពជើងទឹក និងឆ្មាំសមុទ្រ ក្នុងការហាត់សមពីរបៀបអមដំណើរកប៉ាល់ដឹកទំនិញមួយគ្រឿង នៅចំពោះមុខការកើនឡើងវត្តមានកងទ័ពជើងទឹក និងឆ្មាំសមុទ្រចិននៅជុំវិញដែនកោះតៃវ៉ាន់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

តៃវ៉ាន់ដែលត្រូវបានចិនចាត់ទុកថាជាផ្នែកមួយនៃទឹកដីរបស់ខ្លួន បានបារម្ភជាយូរមកហើយថាទីក្រុងប៉េកាំងអាចនឹងព្យាយាមអនុវត្តការបិទខ្ទប់ដើម្បីបង្ខំឱ្យតៃវ៉ាន់សុំចុះចាញ់។ កាលពីខែមិថុនាកន្លងទៅ ចិនបានចាប់ផ្ដើមនូវអ្វីដែលខ្លួនហៅថាជាការអនុវត្តច្បាប់ល្បាតសមុទ្រនៅឯឆ្នេរភាគខាងកើតកោះតៃវ៉ាន់។ នៅក្នុងសេចក្ដីថ្លែងការណ៍មួយចេញផ្សាយនៅថ្ងៃព្រហស្បតិ៍ ទី១៣ ខែសីហា ឆ្នាំ២០២៦ ក្រសួងការពារជាតិតៃវ៉ាន់បានឱ្យដឹងថាសមយុទ្ធប្រឆាំងនឹងការបិទខ្ទប់ធ្វើឡើងដូចសកម្មភាពពិតៗ ដើម្បីពង្រឹងការសម្របសម្រួល ការឆ្លើយតបពីគ្រប់អង្គភាពពាក់ព័ន្ធទាំងអស់ និងពង្រឹងភាពធន់ក្នុងការការពារដែនសមុទ្រ។

សេចក្ដីថ្លែងការណ៍នេះឱ្យដឹងទៀតថា នាវាកងទ័ពជើងទឹកតៃវ៉ាន់បានសហការជាមួយនាវាឆ្មាំសមុទ្រ ដើម្បីហ្វឹកហាត់ពីរបៀបអមដំណើរការពារកប៉ាល់ដឹកទំនិញមួយគ្រឿង រួមជាមួយរបៀបដោះគ្រាប់មីនសមុទ្រ ដើម្បីធានាសុវត្ថិភាពនៃការធ្វើនាវាចរ និងអមដំណើរការពារកប៉ាល់ដឹកទំនិញនោះរហូតទៅដល់កំពង់ផែ។

គួរបញ្ជាក់ថា សមយុទ្ធប្រចាំឆ្នាំរបស់តៃវ៉ាន់មានឈ្មោះថា Han Kuang បានចាប់ផ្ដើមប្រព្រឹត្តទៅចាប់ពីថ្ងៃទី៥ រហូតដល់ថ្ងៃទី១៤ ខែសីហា ដោយមានការរៀបចំសេណារីយ៉ូ ប្រយុទ្ធជាច្រើន ទៅតាមដំណាក់កាលសម្រាប់កងទ័ព និងកងទ័ពបម្រុង ដើម្បីហ្វឹកហាត់ពីការឆ្លើយតបទៅនឹងការវាយប្រហារណាមួយលើកោះតៃវ៉ាន់៕