(ញូវដែលី)៖ ស្របពេលដែលមានសេចក្តីរាយការណ៍ អំពីភាពតានតឹងផ្នែកយោធានៅតំបន់ជួរភ្នំ Himalaya ក្រសួងការបរទេសឥណ្ឌា បានលើកឡើងថា សន្តិភាពតាមបណ្តោយព្រំដែនមានជម្លោះជាមួយចិន មានឥទ្ធិពលលើទំនាក់ទំនងទ្វេភាគី។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី១៣ ខែសីហា ឆ្នាំ២០២៦។

នេះគឺជាការលើកឡើងជាលើកទី ២ររបស់ទីក្រុង New Delhi ក្នុងរយៈពេលមិនដល់ ១សប្តាហ៍ ខណៈប្រទេសទាំងពីរនេះកំពុងព្យាយាមស្តារទំនាក់ទំនងឡើងវិញ បន្ទាប់ពីការប៉ះទង្គិចគ្នាបណ្តាលឱ្យមានមនុស្សស្លាប់ឆ្នាំ ២០២០។ វាក៏បានកើតឡើងមុនកិច្ចប្រជុំនៃក្រុមប្រទេស BRICS ដែលគ្រោងធ្វើឡើងក្នុងទីក្រុង New Delhi ចាប់ពីថ្ងៃទី១២ ដល់ថ្ងៃទី១៣ ខែកញ្ញា ហើយដែលគេរំពឹងថាប្រធានាធិបតីចិន លោក ស៉ី ជីនពីង នឹងចូលរួម។

លោក Randhir Jaiswal អ្នកនាំពាក្យក្រសួងការបរទេសឥណ្ឌា បាននិយាយក្នុងសន្និសីទសារព័ត៌មានមួយថា «សម្រាប់បញ្ហាពាក់ព័ន្ធតំបន់ព្រំដែនរវាងឥណ្ឌា និងចិន យើងតែងតែសង្កត់ធ្ងន់ក្នុងកិច្ចពិភាក្សា ជាមួយភាគីចិនថា យើងចាត់ទុកបញ្ហាទាំងនោះជារឿងធំបំផុត»។ «យើងក៏បានបញ្ជាក់ដែរថា សភាពការណ៍នៅព្រំដែន ជះឥទ្ធិពលដល់ទំនាក់ទំនងទ្វេភាគី»។ នេះជាការបន្ថែមរបស់លោក Randhir Jaiswal នៅពេលឆ្លើយតបនឹងសំណួរអំពីភាពតានតឹងផ្នែកយោធាថ្មីៗ រវាងភាគីទាំងពីរ។

គេហទំព័រព័ត៌មាន ThePrint បានរាយការណ៍ក្រោយសន្និសីទសារព័ត៌មានរបស់ក្រសួងការបរទេសឥណ្ឌា ថាកងល្បាតនៃកងទ័ពឥណ្ឌា និងចិន បានតទល់គ្នានៅក្បែរភូមិដាច់ស្រយាលមួយតាមព្រំដែន ក្នុងស្រុក Upper Subansiri រដ្ឋ Arunachal Pradesh កាលពីចុងខែកក្កដា។ ដោយឡែក បើតាមការឆ្លើយតបចំពោះសំណើសុំការអត្ថាធិប្បាយលើបញ្ហានេះរបស់ Reuters ក្រសួងការបរទេសចិន ថាបច្ចុប្បន្នស្ថានភាពនៅតាមបណ្តោយព្រំដែនជាមួយឥណ្ឌា គឺមានស្ថិរភាពធម្មតា៕