(ប៉េកាំង)៖ យន្តហោះដឹកអ្នកដំណើរ C919 ដែលផលិតដោយប្រទេសចិន បានបញ្ចប់ជើងហោះហើរពាណិជ្ជកម្មអន្តរជាតិលើកដំបូងរបស់ខ្លួន កាលពីថ្ងៃពុធ ទី១២ ខែសីហា ឆ្នាំ២០២៦ ខណៈវាជានិមិត្តរូបនៃការបោះជំហានដ៏សំខាន់មួយ ឆ្ពោះទៅរកគោលដៅរបស់ទីក្រុងប៉េកាំង ក្នុងការប្រកួតប្រជែងជាមួយក្រុមហ៊ុន Boeing និង Airbus ដែលបានត្រួតត្រាវិស័យអាកាសចរណ៍ អស់ជាច្រើនទសវត្សរ៍មកហើយ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

យន្តហោះតួខ្លួនប្រភេទ narrow-body នេះ ត្រូវបានគេចាត់ទុកថាជា គូប្រជែងដ៏មានសក្ដានុពលរបស់យន្តហោះ Boeing 737 ឬ Airbus A320 ទោះបីជាយន្តហោះនេះ មិនទាន់ទទួលបាន ការអនុម័តពីនិយតករអាមេរិក ឬអឺរ៉ុបក៏ដោយ។ ទីក្រុងប៉េកាំងសង្ឃឹមថា យន្តហោះដែលផលិតក្នុងស្រុករបស់ខ្លួន នឹងកាត់បន្ថយការពឹងផ្អែករបស់ចិនលើបច្ចេកវិទ្យាបរទេស និងជួយកសាងការឈរជើងរឹងមាំមួយ នៅក្នុងទីផ្សារសកល។

យន្តហោះ C919 ដែលផលិតដោយក្រុមហ៊ុនសាជីវកម្មយន្តហោះពាណិជ្ជកម្មចិន (COMAC) ដែលជាក្រុមហ៊ុនរដ្ឋ និងធ្វើប្រតិបត្តិការដោយក្រុមហ៊ុនអាកាសចរណ៍ Air China បានហោះចេញពីទីក្រុងប៉េកាំង កាលពីម៉ោង ៣៖១៧នាទីរសៀលថ្ងៃពុធ ហើយបានចុះចតនៅទីក្រុងអ៊ូឡង់បាទ័រ រដ្ឋធានីនៃប្រទេសម៉ុងហ្គោលី នៅម៉ោង ៤៖៥៨នាទីរសៀល ថ្ងៃដដែល។

គួរបញ្ជាក់ថា យន្តហោះ C919 បានធ្វើប្រតិបត្តិការជើងហោះហើរពាណិជ្ជកម្មលើកដំបូងរបស់ខ្លួន កាលពីខែឧសភា ឆ្នាំ២០២៣ ដោយហោះហើរពីទីក្រុងមជ្ឈមណ្ឌលហិរញ្ញវត្ថុរបស់ចិន គឺសៀងហៃ ទៅកាន់រដ្ឋធានីប៉េកាំង។ ចាប់តាំងពីពេលនោះមក យន្តហោះនេះត្រូវបានប្រើប្រាស់ជាប្រចាំ សម្រាប់ជើងហោះហើរពាណិជ្ជកម្មក្នុងស្រុក ក៏ដូចជាជើងហោះហើររវាងចិនដីគោក និងទីក្រុងហុងកុងផងដែរ។ យន្តហោះ C919 ត្រូវបានផលិតនៅក្នុងប្រទេសចិន ប៉ុន្តែទទួលបានគ្រឿងបង្គុំផ្សេងៗ មកពីបណ្តាប្រទេសដទៃទៀត រួមមានទាំងសហរដ្ឋអាមេរិក៕