(មូស្គូ)៖ ប្រព័ន្ធផ្សព្វផ្សាយរដ្ឋនៃប្រទេសរុស្ស៉ី បានរាយការណ៍នៅថ្ងៃព្រហស្បតិ៍ ទី១៣ ខែសីហា ឆ្នាំ២០២៦ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបំពេញទស្សនកិច្ចជាលើកដំបូងទៅកាន់ទីប្រជុំកោះ Kuril ដែលនៅស្ថិតនៅចុងបូព៌ានៃផ្ទៃប្រទេស ខណៈប្រទេសជប៉ុនក៏បានទាមទារផ្នែកមួយចំនួននៃប្រជុំកោះនេះផងដែរ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ទីភ្នាក់ងារព័ត៌មាន TASS បានរាយការណ៍ថា លោក ពូទីន «បានបំពេញទស្សនកិច្ចដោយផ្ទាល់ ទៅកាន់ប្រជុំកោះ Kuril ជាលើកដំបូង» ជាទីដែលលោកបានត្រួតពិនិត្យនាវាយោធាចម្បង របស់កងនាវារុស្ស៉ីប្រចាំតំបន់ប៉ាស៊ីហ្វិក។ កាលពីឆ្នាំ២០១០ ដែលកាលនោះ គឺលោក Dmitry Medvedev គឺជាប្រធានាធិបតី បានក្លាយជាមេដឹកនាំរុស្ស៊ីដំបូងគេ ដែលបានទៅទស្សនកិច្ច ទឹកដីដ៏ចម្រូងចម្រាសនេះ។ លោក Medvedev ក៏បានទៅទីនោះម្តងទៀតផងដែរ ក្នុងឆ្នាំ២០១៩ ក្នុងនាមជានាយករដ្ឋមន្ត្រី។

ក្រោយដំណឹងទស្សនកិច្ចរបស់លោក ពូទីន រដ្ឋាភិបាលជប៉ុន ក៏បានចេញមុខសម្តែងការជំទាស់ភ្លាមៗ។ រដ្ឋមន្រ្តីការបរទេសជប៉ុន លោក Toshimitsu Motegi បានលើកឡើងថា ទឹកដីភូមិភាគខាងជើង ដែលចង់សំដៅលើកោះចំនួន៤ នៅក្នុងប្រជុំកោះ Kuril គឺជាផ្នែកមិនអាចកាត់ផ្តាច់បានដាច់ខាតនៃទឹកដីរបស់ប្រទេសជប៉ុន ទាំងតាមគោលការណ៍ប្រវត្តិសាស្រ្ត និងតាមច្បាប់អន្តរជាតិ ដូច្នេះហើយ​រដ្ឋាភិបាលជប៉ុនជំទាស់ជាខ្លាំងចំពោះដំណើរទស្សនកិច្ច។

ទំនាក់ទំនងរុស្ស៊ី-ជប៉ុន បានជាប់ជំពាក់ដោយភាពតានតឹងជាយូរមកហើយ ជុំវិញទីប្រជុំកោះមានជម្លោះនេះ ដែលត្រូវបានអតីតសហភាពសូវៀត កាន់កាប់កាលពីឆ្នាំ១៩៤៥។ សហភាពសូវៀត បានដណ្តើមយកប្រជុំកោះភ្នំភ្លើង ដែលមានទីតាំងយុទ្ធសាស្ត្រនៅភាគខាងជើងនៃកោះ Hokkaido នេះ នៅប៉ុន្មានថ្ងៃចុងក្រោយនៃសង្គ្រាមលោកលើកទី២ ហើយបានរក្សាវត្តមានយោធានៅទីនោះ ចាប់តាំងពីពេលនោះមក។

កោះទាំងបួនដែលបញ្ហាវិវាទ គឺជាផ្នែកមួយនៃប្រជុំកោះភ្នំភ្លើង Kuril ដែលលាតសន្ធឹងដូចរាងធ្នូយ៉ាងធំទូលាយមួយ ចាប់ពីឧបទ្វីប Kamchatka នៃប្រទេសរុស្ស៊ី ចុះទៅកាន់កោះធំ Hokkaido នៅភាគខាងជើងនៃប្រទេសជប៉ុន។ ឈ្មោះកោះទាំងនេះ គឺស្រដៀងគ្នានៅក្នុងប្រទេសទាំងពីរ។ ពួកវាត្រូវបានហៅថា Kunashir, Habomai, Shikotan និង Iturup ជាភាសារុស្ស៊ី ខណៈជាភាសាជប៉ុនគេស្គាល់ថា Kunashiri, Habomai ,Shikotan និង Etorofu។

គួរបញ្ជាក់ថា នៅកោះទាំងនេះ មានប្រជាជនប្រមាណ ២០ ០០០នាក់ ដែលជាពលរដ្ឋរុស្ស៊ីកំពុងរស់នៅ ក្រោមលក្ខខណ្ឌអាកាសធាតុលំបាក។ ប៉ុន្តែពួកវាមានផ្ទុកធនធានរ៉ែផ្សេងៗ ដូចជាមាស និងប្រាក់ ហើយជាតំបន់នេសាទដ៏សម្បូរបែប។ បន្ទាប់ពីកោះទាំងនេះ ត្រូវបានកាន់កាប់ក្នុងឆ្នាំ១៩៤៥ ទីក្រុងម៉ូស្គូបានបណ្តេញប្រជាជនជប៉ុនប្រមាណ ១៧ ០០០នាក់ចេញ៕