(ហ្សាការតា)៖ ការិយាល័យអគ្គរដ្ឋអាជ្ញាឥណ្ឌូណេស៉ី (AGO) បានចោទប្រកាន់មន្ត្រីពន្ធដារ ២រូប ពីបទទទួលសំណូកពីក្រុមហ៊ុនផលិតវត្ថុធាតុដើមសម្រាប់ធ្វើក្រដាស តាមរយៈការជួយបន្លំវិក្កយបត្រ បណ្តាលឱ្យរដ្ឋខាតបង់ថវិកាប្រមាណ ២ទ្រីលាន rupiah ឬ ១១១,៩៥លានដុល្លារ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី១៣ ខែសីហា ឆ្នាំ២០២៦។

លោក Saiful Bahri Siregar ប្រធានផ្នែកស៉ើបអង្កេតនៃអង្គភាពឧក្រិដ្ឋកម្មពិសេសរបស់ AGO បានប្រាប់អ្នកសារព័ត៌មានកាលពីថ្ងៃពុធថា ក្រុមហ៊ុន Toba Pulp Lestari បានចេញវិក្កយបត្រ ដោយសរសេរដាក់តម្លៃទាបជាងតម្លៃពិត អំឡុងឆ្នាំ២០០៨ ដល់ឆ្នាំ២០២៥។ ក្រុមហ៊ុនដែលប្រកបអាជីវកម្ម ក្នុងវិស័យកែច្នៃសាច់ឈើសម្រាប់ធ្វើក្រដាស និងវិស័យព្រៃឈើនេះ បាននាំចេញផលិតផលសាច់ឈើ ទៅកាន់ក្រុមហ៊ុនបុត្រសម្ព័ន្ធ តាំងពីឆ្នាំ២០០៨មក ដោយបន្លំលេខកូដទំនិញ។ សកម្មភាពនេះ បណ្តាលឱ្យមានការថយចុះចំណូលពន្ធលើប្រាក់ចំណូលក្រុមហ៊ុន ដែលរដ្ឋគួរតែទទួលបាន។

រដ្ឋអាជ្ញាមិនបានចាត់ថ្នាក់ក្រុមហ៊ុនខាងលើនេះ ថាគួរឱ្យសង្ស័យទេ។ ប៉ុន្តែថាជនសង្ស័យទាំង ២នាក់ ដែលគេស្គាល់ត្រឹមអក្សរកាត់ BP និង SR គឺជាអ្នកចុះពិនិត្យការបង់ពន្ធរបស់ក្រុមហ៊ុននោះ ចន្លោះឆ្នាំ២០២០ និង២០២៤។ តាមលោក Siregar ជនសង្ស័យបានប្រព្រឹត្តខុសច្បាប់ ដោយមិនបំពេញភារកិច្ច និងតួនាទីក្នុងនាមជាអ្នកចុះត្រួតពិនិត្យ ហើយជនសង្ស័យក៏បានទទួលប្រាក់មួយចំនួនពីក្រុមហ៊ុនផងដែរ។ ជនសង្ស័យរងការចោទប្រកាន់ថា បានបំពានមាត្រាប្រឆាំងអំពើពុករលួយនៃក្រមព្រហ្មទណ្ឌឥណ្ឌូណេស៉ី ដែលទោសទណ្ឌធ្ងន់បំផុត គឺជាប់ពន្ធនាគារអស់មួយជីវិត៕