(អង់ការ៉ា)៖ ក្រសួងការពារជាតិតួកគីយ៉េ បានប្រកាសនៅថ្ងៃព្រហស្បតិ៍ថា ប្រទេសតួកគីយ៉េ អារ៉ាប៊ីសាអូឌីត និងប៉ាគីស្ថាន នឹងបង្កើតយន្តការសម្របសម្រួលកម្រិតខ្ពស់ ធ្វើសមយុទ្ធរួមគ្នា និងជំរុញកិច្ចសហប្រតិបត្តិការឧស្សាហកម្មយោធា ក្រោមកិច្ចព្រមព្រៀងការពារជាតិត្រីភាគីដែលទើបចុះហត្ថលេខាថ្មីៗនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ប្រទេសមូស្លីមនិកាយស៊ុននីទាំងបី ដែលសុទ្ធសឹងជាសម្ព័ន្ធមិត្តអាមេរិក បានសម្តែងក្តីបារម្ភយ៉ាងខ្លាំងចំពោះអស្ថិរភាពក្នុងតំបន់ ជាពិសេសការវាយប្រហារដោយមីស៊ីលរបស់អ៊ីរ៉ង់លើប្រទេសនៅតំបន់ឈូងសមុទ្រ។ កាលពីថ្ងៃទី០៧ ខែសីហា ពួកគេបានចុះហត្ថលេខាលើ «កិច្ចព្រមព្រៀងការពារជាតិរួមម៉ិកកា» (Mecca Joint Defence Agreement) ដោយចែងយ៉ាងច្បាស់ថា ការវាយប្រហារលើសមាជិកណាមួយ គឺស្មើនឹងការវាយប្រហារលើសមាជិកទាំងអស់ ស្រដៀងនឹងមាត្រា៥ របស់ណាតូ (NATO) ដែរ។

ក្រសួងការពារជាតិតួកគីយ៉េបានបញ្ជាក់ថា កិច្ចព្រមព្រៀងនេះនឹងបង្កើតយន្តការសហការជាយុទ្ធសាស្ត្រ ដែលមានការចូលរួមពីរដ្ឋមន្ត្រីការពារជាតិ រដ្ឋមន្ត្រីការបរទេស និងអគ្គមេបញ្ជាការកងទ័ព។ បន្ថែមពីនេះ នឹងមានការរៀបចំសមយុទ្ធយោធាចម្រុះ រួមមានកងទ័ពជើងគោក ជើងទឹក ជើងអាកាស និងប្រព័ន្ធដ្រូន ព្រមទាំងផ្តោតលើការផលិតអាវុធរួមគ្នា ការចែករំលែកបច្ចេកវិទ្យា និងការអភិវឌ្ឍប្រព័ន្ធសង្គ្រាមអេឡិចត្រូនិក និងបញ្ញាសិប្បនិម្មិត (AI)។

គួររំលឹកថា តួកគីយ៉េដែលមានកម្លាំងយោធាធំទីពីរក្នុងណាតូ បានបញ្ជាក់ថា កិច្ចព្រមព្រៀងជាមួយប្រទេសមានអាវុធនុយក្លេអ៊ែរ (ប៉ាគីស្ថាន) និងប្រទេសមហាអំណាចប្រេង (អារ៉ាប៊ីសាអូឌីត) នេះ គឺបើកចំហសម្រាប់ប្រទេសផ្សេងទៀត ដូចជាអេហ្ស៊ីបជាដើម។ ទន្ទឹមនឹងនេះ តួកគីយ៉េក៏កំពុងចូលរួមយ៉ាងសកម្មនៅក្នុងកិច្ចប្រជុំនានា ដើម្បីបង្កើតសម្ព័ន្ធភាពអន្តរជាតិការពារនាវាចរណ៍នៅសមុទ្រក្រហមផងដែរ៕