(ម៉ូស្គូ)៖ អភិបាលតំបន់គ្រីមៀ (Crimea) ដែលរុស្ស៊ីបានកាត់យក បានប្រកាសនៅថ្ងៃព្រហស្បតិ៍ថា មន្ត្រីយោធារុស្ស៊ីម្នាក់ត្រូវបានសម្លាប់ក្នុងការបំផ្ទុះគ្រាប់បែក ហើយស្ត្រីជនជាតិរុស្ស៊ីម្នាក់ត្រូវបានចាប់ខ្លួន ក្រោមការសង្ស័យថាបានធ្វើការឱ្យភ្នាក់ងារសម្ងាត់អ៊ុយក្រែន។ នេះបើតាមការចេញផ្សាយដោយបណ្តាញព័ត៌មានអន្តរជាតិ។

ទោះបីជាអាជ្ញាធរមិនបញ្ចេញឈ្មោះជនរងគ្រោះក្តី ប៉ុន្តែបណ្តាញសង្គម Telegram របស់រុស្ស៊ីបានអះអាងថា ជនរងគ្រោះគឺលោក រ៉ូបឺត សាហ្គេយេវ (Robert Shageyev)។ លោកគឺជាអតីតមេបញ្ជាការនាវាមុជទឹកអ៊ុយក្រែន ដែលបានចុះចូលជាមួយរុស្ស៊ីអំឡុងព្រឹត្តិការណ៍រឹបអូសតំបន់គ្រីមៀក្នុងឆ្នាំ២០១៤។ ស្របពេលនេះដែរ គេហទំព័ររបស់អ៊ុយក្រែនដែលកត់ត្រាឈ្មោះជនក្បត់ជាតិ ក៏បានបញ្ជាក់ថា លោក សាហ្គេយេវ ត្រូវបាន «កម្ចាត់ចោល» រួចហើយ។

ការធ្វើឃាតនេះកើតឡើងនៅទីក្រុង Sevastopol ខណៈខាងភាគីអ៊ុយក្រែនមិនទាន់មានការឆ្លើយតបជាផ្លូវការនៅឡើយទេ។ គួររំលឹកថា កន្លងមករុស្ស៊ីតែងតែចោទប្រកាន់អ៊ុយក្រែនជុំវិញការធ្វើឃាតមន្ត្រីយោធាជាន់ខ្ពស់របស់ខ្លួនជាបន្តបន្ទាប់។

ដោយឡែក អភិបាលតំបន់ដដែល ក៏បានបញ្ជាក់បន្ថែមផងដែរថា មានមនុស្ស ៥នាក់ផ្សេងទៀតបានស្លាប់កាលពីយប់មិញ ក្នុងអំឡុងពេលប្រតិបត្តិការដោះបន្សាបគ្រាប់បែកមួយកន្លែងទៀតនៅក្នុងទីក្រុង Sevastopol នេះ៕