(ប៉ារីស)៖ មនុស្សរាប់លាននាក់នៅទូទាំងតំបន់អឺរ៉ុប ជាពិសេសក្នុងប្រទេសបារាំង អ៉ីតាលី អេស្ប៉ាញ និងចក្រភពអង់គ្លេស បានទទួលរងនូវឥទ្ធិពលនៃរលកកម្តៅជាថ្មីទៀត នៅថ្ងៃព្រហស្បតិ៍ ទី១៣ ខែសីហា ឆ្នាំ២០២៦។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP។

តាមការព្យាករ មនុស្សជាង ១៣៥លាននាក់ត្រូវប្រឈមសីតុណ្ហភាពលើស ៣៥អង្សាសេ ដោយចក្រភពអង់គ្លេស បានកត់ត្រាថ្ងៃក្តៅបំផុតទី ៥របស់ខ្លួន ហើយផ្នែកខ្លះនៃប្រទេសបារាំង មានសីតុណ្ហភាពលើស ៤២អង្សាសេ។ នៅឯអ៉ីតាលីវិញ សីតុណ្ហភាពកម្រិតស្រដៀងគ្នានឹងបារាំង ត្រូវបានគេព្យាករណ៍ថានឹងប៉ះពាល់ដល់មនុស្ស ២៩លាននាក់។

អឺរ៉ុប ជាទ្វីបដែលមានការឡើងកម្តៅលឿនបំផុត ហើយនៅកន្លែងខ្លះគ្មានឧបករណ៍គ្រប់គ្រាន់ ដើម្បីទប់ទល់នឹងអាកាសធាតុក្តៅនោះទេ។ អាកាសធាតុក្តៅ និងកាន់តែញឹកញាប់ជាងមុន ត្រូវបានក្រុមអ្នកវិទ្យាសាស្ត្រ ដាក់បន្ទុកលើកត្តាប្រែប្រួលអាកាសធាតុបង្កឡើងដោយមនុស្ស។

តាមការវិភាគរបស់ AFP ដែលផ្អែកលើទីភ្នាក់ងារឧតុនិយមអាល្លឺម៉ង់ (DWD) និងការព្យាករចំនួនប្រជាជនឆ្នាំ២០២៥ ពីមជ្ឈមណ្ឌលស្រាវជ្រាវរួម សីតុណ្ហភាពនឹងមានកម្រិតលើស ៣០អង្សាសេ សម្រាប់ប្រជាជនអឺរ៉ុបជិត ៦០ភាគរយ ដោយមិនរាប់បញ្ចូលប្រទេសតួកគីយ៉េ ឬប្រហែល ៣៤០លាននាក់។ ការរកឃើញនេះគឺស្របនឹងការរកឃើញរបស់អង្គការមិនមែនរដ្ឋាភិបាលអូទ្រីស Klimadashboard។

គួរបញ្ជាក់ថា រលកកម្តៅ និងគ្រោះរាំងស្ងួតម្តងហើយម្តងទៀត បង្កើតបានប្រវត្តិសាស្រ្តនៃភ្លើងឆេះព្រៃ និងបានរួមចំណែកដល់ការស្លាប់របស់មនុស្សរាប់ពាន់នាក់៕