(Panama City)៖ រដ្ឋមន្រ្តីការពារជាតិអាមេរិក លោក Pete Hegseth បាននិយាយនៅថ្ងៃពុធសប្តាហ៍នេះ អំពីលទ្ធភាពនៃការវាយប្រហាររួមគ្នាលើក្រុមប្រដាប់អាវុធនៅកូឡុំប៊ី ខណៈដែលលោកបានស្វាគមន៍កូឡុំប៊ី ឱ្យចូលរួមក្នុងក្រុមចម្រុះប្រយុទ្ធប្រឆាំងនឹងគ្រឿងញៀនដឹកនាំដោយយោធា បន្ទាប់ពីប្រធានាធិបតីថ្មីឡើងកាន់តំណែងកាលពីសប្តាហ៍មុន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី១៤ ខែសីហា ឆ្នាំ២០២៦។

កូឡុំប៊ីមានសិទ្ធិអំណាច «ក្នុងការចូលរួមប្រតិបត្តិការយោធារួម ដើម្បីកម្ចាត់ក្រុមភេរវករ និងបណ្តាញភេរវកម្ម»។ នេះជាការបញ្ជាក់របស់លោក Hegseth ទៅកាន់ពិធីជួបជុំក្រុមចម្រុះប្រឆាំងការជួញដូរគ្រឿងញៀនអាមេរិកដឹកនាំដោយសហរដ្ឋអាមេរិក ដែលរៀបចំឡើងនៅក្នុងប្រទេសប៉ាណាម៉ា។

នៅពេលត្រូវបានសួរថា តើលោកបានពិភាក្សាជាមួយសមភាគីកូឡុំប៊ី អំពីលទ្ធភាពវាយប្រហាររួមគ្នាប្រឆាំងនឹងក្រុមប្រដាប់អាវុធ ដូចជាកងទ័ពរំដោះជាតិ ELN ដែលអាមេរិកចាត់ថ្នាក់ជាក្រុមភេរវករ និងសំណល់នៃកងកម្លាំងប្រដាប់អាវុធបដិវត្តន៍កូឡុំប៊ី ឬទេ? លោក Hegseth បានឆ្លើយថា «បាទ» ដោយបន្ថែមថា «អង្គការ​ភេរវកម្ម​ដែល​​កំណត់ទុក ជាមួយ​រដ្ឋាភិបាល​ដែល​សហការ នឹង​ក្លាយជា​គោលដៅ​ស្របច្បាប់​របស់​រដ្ឋាភិបាលអាមេរិក​» រួមទាំងកូឡុំប៊ីផងដែរ។

គួរបញ្ជាក់ថា ប្រធានាធិបតីកូឡុំប៊ី លោក Abelardo De La Espriella ដែលទើបស្បថចូលកាន់តំណែង បានសន្យាលុបបំបាត់បញ្ហាដំណាំខុសច្បាប់ទាំងស្រុង ហើយប្តេជ្ញាចូលរួមកម្មវិធីការពារសន្តិសុខ ដែលបង្កើតឡើងដោយលោកប្រធានាធិបតី ដូណាល់ ត្រាំ។ ការប្តេជ្ញាចិត្តនេះត្រូវបានទទួលយកដោយរដ្ឋបាលលោក ត្រាំ តាមរយៈការប្រកាសពីផែនការផ្តល់ជំនួយសន្តិសុខ ១ពាន់លានដុល្លាររបស់សហរដ្ឋអាមេរិក ដល់រដ្ឋាភិបាលកូឡុំប៊ីថ្មី៕