(វ៉ាស៊ីនតោន)៖ ប្រធានាធិបតីអាមេរិក ដូណាល់ ត្រាំ កាលពីថ្ងៃព្រហស្បតិ៍ ទី១៣ ខែសីហា ឆ្នាំ២០២៦ បាននិយាយថា លោកនឹងដាក់ពន្ធលើការនាំចូលដ្រូន និងគ្រឿងបង្គុំរបស់ពួកវា ក្នុងនោះរួមមានទាំងមកពីសម្ព័ន្ធមិត្តសំខាន់ៗមួយចំនួនផងដែរ ខណៈដែលរដ្ឋបាលរបស់លោកបានលើកឡើងថា សហរដ្ឋអាមេរិកពឹងផ្អែកខ្លាំងពេក លើប្រភពដ្រូនពីបរទេស។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

សេតវិមានបានបញ្ជាក់ថា សេចក្តីប្រកាសដែលចុះហត្ថលេខាដោយលោក ត្រាំ នឹងដាក់ពន្ធគិតតាមតម្លៃ (Ad valorem tax) ក្នុងអត្រារហូតដល់ ១០០ភាគរយ លើប្រភេទដ្រូនដែលមានទំហំ និងសមត្ថភាពជាក់លាក់មួយចំនួន ដែលត្រូវបានចាត់ទុកថា អាចប៉ះពាល់ចំពោះ​សន្តិសុខជាតិអាមេរិក ហើយពន្ធ២៥ភាគរយ នឹងត្រូវដាក់លើដ្រូនដែលមានទំហំតូចជាងនោះ។ ដោយឡែក ពន្ធ១៥ភាគរយ នឹងត្រូវដាក់លើដ្រូននិងគ្រឿងបង្គុំមកពីសហភាពអឺរ៉ុប ជប៉ុន លិចតិនស្តាញ កូរ៉េខាងត្បូង ស្វ៉ីស និងកោះតៃវ៉ាន់ ហើយពន្ធ ១០% នឹងត្រូវដាក់លើដ្រូនមកពីចក្រភពអង់គ្លេស។

លោក ត្រាំ បានឱ្យដឹងនៅក្នុងសេចក្តីប្រកាស ដែលចេញផ្សាយដោយសេតវិមានថា រដ្ឋមន្ត្រីពាណិជ្ជកម្មអាមេរិក លោក Howard Lutnick បានបើកការស៊ើបអង្កេតលើផលប៉ះពាល់ នៃការនាំចូលប្រព័ន្ធយន្តហោះគ្មានមនុស្សបើក (UAS) ឬដ្រូន។ លោកត្រាំ បានបន្តថា លោករដ្ឋមន្ត្រីបានរកឃើញថា សហរដ្ឋអាមេរិកនាំចូលដ្រូននិងគ្រឿងបង្គុំរបស់ពួកវា ក្នុងបរិមាណយ៉ាងច្រើន ហើយពឹងផ្អែកខ្លាំងជ្រុលលើប្រភពដ្រូននិងគ្រឿងបង្គុំពីបរទេស»។

គួរបញ្ជាក់ថា​ លោក ត្រាំ បានយកវិធានពន្ធគយធ្វើជាសសរស្តម្ភនៃគោលនយោបាយការបរទេស និងពាណិជ្ជកម្មរបស់លោក ទោះបីជាមានឧបសគ្គផ្នែកច្បាប់ និងការរិះគន់ពីក្រុមអ្នកវិភាគមួយចំនួនក៏ដោយ។ សេតវិមានបានឱ្យដឹងថា ពន្ធគយដ្រូនខាងលើ នឹងចូលជាធរមានក្នុងរយៈពេល ២១ថ្ងៃ៕