(ហ្សាការតា)៖ ប្រធានាធិបតីនៃប្រទេសឥណ្ឌូណេស៉ី លោក Prabowo Subianto នៅថ្ងៃសុក្រ ទី១៤ ខែសីហា ឆ្នាំ២០២៦ បានប្រកាសថា រដ្ឋាភិបាលនឹងបិទសហគ្រាសរដ្ឋសរុបជាង ៧៥០កន្លែង មុនដំណាច់ឆ្នាំនេះ ហើយក៏កំពុងពិចារណាផងដែរ លើ​លទ្ធភាពបង្កើតតុលាការពិសេសមួយ ដើម្បីស៉ើបអង្កេតគណៈប្រឹក្សាភិបាលដែលគ្មានផលិតភាព។ នេះបើតាមការចេញផ្សាយ​ដោយទីភ្នាក់ងារព័ត៌មាន AFP។

អំឡុងការថ្លែងសារប្រចាំឆ្នាំនៅសភាឥណ្ឌូណេស៉ី លោក Prabowo បានលើកឡើងថា វាហាក់ដូចជាមានច្រើនខ្លាំងពេកហើយ នូវសហគ្រាសរដ្ឋដែលមិនមានផលិតភាព ដែលតែងតែរាយការណ៍ពីការខាតបង់ ប៉ុន្តែទន្ទឹមគ្នាអះអាងពីប្រាក់ចំណេញ ខណៈប្រាក់ចំណេញទាំងនោះ គ្រាន់តែជាការប្រឌិតឡើងប៉ុណ្ណោះ។ លោកប្រធានាធិបតី បានប្រាប់សមាជិកសភាថា ជាមួយនឹងការបង្កើតមូលនិធិទ្រព្យសម្បត្តិរដ្ឋ Danantara របស់ឥណ្ឌូណេស៊ី កាលពីឆ្នាំ២០២៥ ដើម្បីគ្រប់គ្រងទ្រព្យសម្បត្តិរដ្ឋ «យើងបានរកឃើញថា សហគ្រាសរដ្ឋមានចំនួនដល់ទៅ ១០៧៤»។

លោកបានបន្តថា «ខ្ញុំធ្លាប់គិតថាសហគ្រាសរដ្ឋមានចំនួនត្រឹម៣០០ ឬ៤០០កន្លែង ប៉ុន្តែជាក់ស្តែង គឺមាន១០៧៤កន្លែង។ ហើយសហគ្រាសរដ្ឋទាំងនេះ ពេលខ្លះធ្វើប្រតិបត្តិការតាមអំពើចិត្ត ដោយគ្មានស្មារតីទទួលខុសត្រូវចំពោះជាតិ ឬចំពោះរដ្ឋឡើយ»។ លោក Prabowo បានបន្ថែមថា រហូតមកដល់ពេលនេះ សហគ្រាសចំនួន២៩០ ត្រូវបានបិទ ហើយត្រឹមថ្ងៃទី៣១ ខែធ្នូ ខាងមុខ គួរតែនៅសល់មិនលើសពី ៣០០កន្លែងទេ។

លោកប្រធានាធិបតីឥណ្ឌូណេស៉ី បានបន្ថែមថា «យើងនឹងបិទសហគ្រាសរុបជាង៧៥០កន្លែង ហើយរក្សាទុកតែសហគ្រាសណា ដែលមានផលិតភាព ដែលបង្កើតតម្លៃបន្ថែម សម្រាប់ប្រជាជន»។ លោកអះអាងថា កិច្ចប្រឹងប្រែងនេះ សន្សំសំចៃប្រាក់បានខ្ទង់៥០ទ្រីលានរូពី (ជាង ២,៨ពាន់លានដុល្លារ) រួចស្រេចហើយ ក្នុងការចំណាយលើការធ្វើប្រតិបត្តិការជាប្រចាំ ក្នុងនោះរួមទាំងប្រាក់បៀវត្សរ៍របស់នាយកក៏ដូចជាសមាជិកគណៈកម្មការ ការជួលអគារនិងរថយន្ត ព្រមទាំងការចុះបំពេញបេសកកម្ម។ បើតាមលោក Prabowo គោលដៅសម្រាប់ឆ្នាំនេះ គឺសន្សំសំចៃសរុបឱ្យបានជាង ៧០ទ្រីលានរូពី។

គួរបញ្ជាក់ថា លោក Prabowo ក៏បានលើកឡើងផងដែរពីគំនិតបង្កើតតុលាការពិសេសបណ្ដោះអាសន្នមួយ ដើម្បីបើកការស៊ើបអង្កេត លើការគ្រប់គ្រងនិងក្រុមប្រឹក្សាភិបាលនានា គិតចាប់តាំងពី៣០ឆ្នាំមុនមក។ ប៉ុន្តែលោកបានស្នើសុំឱ្យក្រុមសមាជិកសភា ពិចារណាអំពីការលើកលែងទោសពិសេស សម្រាប់អ្នកដែលទទួលស្គាល់កំហុស ហើយចេះកែខ្លួន៕