(តូក្យូ)៖ ឯកអគ្គរដ្ឋទូតសហរដ្ឋអាមេរិកប្រចាំទីក្រុងតូក្យូ បាននិយាយនៅថ្ងៃសុក្រ ទី១៤ ខែសីហា ឆ្នាំ២០២៦ថា អាមេរិកទទួលស្គាល់អធិបតេយ្យភាពរបស់ជប៉ុនលើកោះនានា ដែលប្រធានាធិបតីរុស្ស៊ី លោក វ្ល៉ាឌីមៀ ពូទីន ទើបតែបានបំពេញទស្សនកិច្ចទៅកាន់ ក្នុងសប្តាហ៍នេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ឯកអគ្គរដ្ឋទូតអាមេរិក លោក George Glass បានបង្ហោះសារនៅលើបណ្តាញសង្គម ដោយប្រើឈ្មោះជប៉ុនសម្រាប់ទីប្រជុំកោះ Kuril ដែលលោក ពូទីន បានទៅបំពេញទស្សនកិច្ចជាលើកដំបូង កាលពីថ្ងៃព្រហស្បតិ៍ថា «សហរដ្ឋអាមេរិកនៅតែឥតងាករេ ក្នុងការគាំទ្រសម្ព័ន្ធមិត្តដ៏សំខាន់បំផុតរបស់ខ្លួន និងក្នុងការទទួលស្គាល់អធិបតេយ្យភាពរបស់ជប៉ុន លើដែនដីភាគខាងជើង»។ លោក Glass បានបន្ថែមថា «អំឡុងពេលដែលសម្ព័ន្ធភាពអាមេរិក-ជប៉ុន កំពុងប្តេជ្ញាចិត្ត ក្នុងការលើកកម្ពស់វិបុលភាព នៅទូទាំងតំបន់ឥណ្ឌូប៉ាស៊ីហ្វិក យើងប្រឆាំងយ៉ាងដាច់អហង្ការ ចំពោះសកម្មភាពណាមួយ ដែលធ្វើឱ្យប៉ះពាល់ដល់សន្តិភាព និងស្ថិរភាពនៃតំបន់នេះ»។

ទំនាក់ទំនងរុស្ស៊ី-ជប៉ុន បានរងការរំខានជាយូរមកហើយដោយសារតែ បញ្ហាទីប្រជុំកោះខាងលើ ដែលត្រូវបានអតីតសហភាពសូវៀត ដណ្តើមកាន់កាប់កាលពីឆ្នាំ១៩៤៥ អំឡុងប៉ុន្មានថ្ងៃចុងក្រោយនៃសង្គ្រាមលោកលើកទី២។ ដំណើរទស្សនកិច្ចរបស់លោក ពូទីន គឺជាលើកដំបូងបំផុតធ្វើឡើងដោយប្រធានាធិបតីរុស្ស៊ី គិតចាប់តាំងពីលោក Dmitry Medvedev ក្នុងឆ្នាំ២០១០។

នាយករដ្ឋមន្ត្រីជប៉ុន លោកស្រី Sanae Takaichi បាននិយាយថា «ដែនដីភាគខាងជើង គឺជាផ្នែកមួយ ដែលមិនអាចកាត់ផ្តាច់បាននៃទឹកដីរបស់ប្រទេសជប៉ុន ទាំងតាមគោលការណ៍ប្រវត្តិសាស្ត្រ និងក្រោមច្បាប់អន្តរជាតិ»។ ឆ្លើយតបការបំពេញទស្សនកិច្ចរបស់លោក ពូទីន ជប៉ុនបានកោះហៅឯកអគ្គរដ្ឋទូតរុស្ស៊ីប្រចាំទីក្រុងតូក្យូ។ស្ថានទូតរុស្ស៊ីប្រចាំប្រទេសជប៉ុន បានឱ្យដឹងថា ឯកអគ្គរដ្ឋទូតរបស់ខ្លួនបានលើកឡើងថា កោះទាំងនេះ គឺជាផ្នែកមួយដែលមិនអាចកាត់ផ្តាច់បាននៃសហព័ន្ធរុស្ស៊ី ហើយថា ដំណើរទស្សនកិច្ចរបស់លោក ពូទីន នៅទីនោះមិនមែនជា បញ្ហាសម្រាប់ពិភាក្សាជាមួយរដ្ឋបរទេសនោះទេ។

ដោយឡែក លោកស្រី Shirin Yaseen ដែលជាអ្នកនាំពាក្យអគ្គលេខាធិការអង្គការសហប្រជាជាតិ លោក Antonio Guterres បានចេញមុខនិយាយថា បញ្ហាខាងលើគឺជាបញ្ហាទ្វេភាគីរវាងរដ្ឋជាសមាជិក៕