(Reuters)៖ យន្ដហោះដឹកអ្នកដំណើររបស់ក្រុមហ៊ុនអាកាសចរណ៍ Vietnam Airlines បានបង្ខំចិត្តបកក្បាលត្រឡប់ទៅកាន់ទីក្រុង Munich វិញ (ប្រទេសអាល្លឺម៉ង់) កាលពីថ្ងៃសៅរ៍ ទី១៥ ខែសីហា ឆ្នាំ២០២៦ បន្ទាប់ពីហោះវិលជុំអស់ជាង ២ម៉ោង ដើម្បីដុតប្រេងឥន្ធនៈបញ្ចុះទម្ងន់យន្ដហោះ ក្រោយយន្ដហោះធុន Boeing 787 នេះមានបញ្ហានៅពេលហោះឡើង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

តាមគេហទំព័រ Flightradar24 យន្ដហោះខាងលើបានចុះចតដោយសុត្ថិភាព រីឯអ្នកដំណើរទាំងអស់ត្រូវបានជម្លៀសចុះពីលើយន្ដហោះដោយសុវត្ថិភាពផងដែរ។ នៅក្នុងសេចក្ដីថ្លែងការណ៍មួយ ក្រុមហ៊ុន Vietnam Airlines បាននិយាយថាជើងហោះដែលមានគោលដៅធ្វើដំណើរឆ្ពោះទៅកាន់ទីក្រុងហាណូយ បានបកក្បាលត្រឡប់ទៅកាន់អាកាសយានដ្ឋានដែលខ្លួនបានចេញដំណើរវិញ បន្ទាប់ពីមានបញ្ហាបច្ចេកទេសនៅពេលហោះឡើង។ ប៉ុន្តែខាងក្រុមហ៊ុនមិនបានបញ្ជាក់ឱ្យច្បាស់ថាជាបញ្ហាអ្វីនោះទេ ដោយគ្រាន់តែបន្ថែមថា ពីឡុតបានអនុវត្តតាមបទដ្ឋានសុវត្ថិភាពទាំងអស់ដែលតម្រូវជាចាំបាច់ និងបានចុះចតដោយសុវត្ថិភាពនៅអាកាសយានដ្ឋាន Munich។

តាម Vietnam Airlines ក្រុមហ៊ុនរបស់ខ្លួនកំពុងធ្វើកិច្ចសហប្រតិបត្តិការជាមួយអាជ្ញាធរពាក់ព័ន្ធ ដើម្បីត្រួតពិនិត្យយន្ដហោះ៕